10 yaşlı Nərmin Quliyevanın ölümünə görə ittiham olunan İlkin Süleymanova 20 il cəza istənildi. Məhkəmə üzə çıxan ziddiyətləri araşdırdımı? – Rüfət Səfərov Çətin sualda

Bakı/05.05.23/Turan: Gündəmin əsas müzakirə mövzularından biri Tovuz rayonunun Dondar Quşçu kəndində 10 yaşlı Nərmin Quliyevanı oğurlayıb öldürməkdə ittiham olunan İlkin Süleymanova prokurorun 20 il azadlıqdan məhrumetmə cəzası istəməsidir.

Mayın 3-də Gəncə Ağır Cinayətlər Məhkəməsində 10 yaşlı Nərmin Quliyevanı oğurlayıb 47 gün yaşadığı evdə gizlətməkdə, sonra öldürərək cəsədini yandırmaqda təqsirləndirilən Tovuzun Dondar Quşçu kənd sakini İlkin Süleymanova prokuror 20 il həbs cəzası istəyib.

1973-cü il təvəllüdlü İlkin Süleymanov Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 133.2.1 (oğurlanmış şəxsə əzab vermə), 133.2.4 (yetkinlik yaşına çatmayan, köməksiz vəziyyətdə olan şəxsə əzab vermə), 144-cü (adam oğurluğu) maddələrilə ittiham olunur.

İttihama əsasən, o, sinif yoldaşı Şərif Quliyevin ailəsi, uşaqları olduğuna görə onu qısqanıb, buna görə də onun qızı Nərmini övladlığa götürmək məqsədilə oğurlayıb. 47 gün sonra isə qətlə yetirərək meyiti evlərinin yaxınlığında yandırıb.

İlkin Süleymanov isə azyaşlının ölümünə aidiyyəti olmadığını deyir. İlkin ifadəsindəki etirafa gəlincə, o bildirib ki, 2020-ci il yanvarın 6-dan 10-na qədər Tovuz rayon Polis Şöbəsində işgəncəyə məruz qalıb. Dörd gün sonra işgəncələrə dözməyərək, etiraf ifadəsinə imza atmağa məcbur olub. Baş Prokurorluq isə işgəncə iddialarını təkzib edib.

Hüquq müdafiəçisi Rüfət Səfərov Kamran Mahmudovun təqdimatında yayımlanan “Çətin sual” verilişində bu barədə danışır.