Azərbaycan Ermənistan sərhəddindəki gərginlik nə ilə nəticələnə bilər? - Azad İsazadə Çətin sualda

Son günlər rəsmi Bakı Ermənistan qoşunlarının və texnikasının Azərbaycanla sərhədə- Ermənistanın Naxçıvanla sərhədinə  yığılması haqqında məlumatlar yayır. Ermənistan isə bu xəbərləri təkzib edir. Ermənistan tərəfinin məlumatına görə, təqdim edilən videokadrlarda arxa cəbhədə müdafiə infrastrukturunun tikintisi əksini tapıb ki, bu da Ermənistanın suveren hüququdur.

Bu arada aprelin 1-də Azərbaycan Müdafiə Nazirliyi Ermənistan silahlı qüvvələrinin bölmələri Azərbaycan Ordusunun Naxçıvan Muxtar Respublikasının Sədərək rayonunun Heydərabad və Şahbuz rayonunun Biçənək yaşayış məntəqələri istiqamətlərindəki mövqelərini atıcı silahlardan atəşə tutması barədə məlumat yaydı. Ermənistan tərəfi isə Azərbaycanı ittiham etdi.

Azərbaycan Ermənistanın ərazi bütövlüyünü təhdid edir və sərhəddə gərginliyi artırır. Bunu Fransanın Avropa və xarici işlər naziri Stefan Sejourne ABŞ dövlət katibi Entoni Blinken ilə aprelin  2 də Parisdə birgə mətbuat konfransı zamanı deyib. Azərbaycan XİN bu iddiaları əsassız adlandırıb.

Ermənistanın Belçikadakı fövqəladə və səlahiyyətli səfiri, Ermənistanın Aİ-dəki daimi nümayəndəsi Tiqran Balayan “X” platformasındakı səhifəsində yazıb ki, "Əliyev rejimi və müttəfiqləri baş nazir Nikol Paşinyanın ABŞ dövlət katibi Antoni Blinken və Avropa Komissiyasının rəhbəri Ursula fon der Leyenlə aprelin 5-nə planlaşdırılan görüşünü pozmaq məqsədilə Pasxa bayramında Ermənistana hücum etmək istəyirlər".

Həqiqətənmi, sərhəddəki gərginlik arta bilər?

Hərbi ekspert Azad İsazadə Kamran Mahmudovun təqdimatında yayımlanan “Çətin sual” verilişində bu barədə danışır.