Azərbaycan Fransanı, Ermənistan Azərbaycanı regionda təxribat yaratmaqda ittiham edir. – Xaləddin İbrahimli saat 16:00-da Çətin sualda

Yerevan və Parisin Fransanın “CAESAR” özüyeriyən silahlarının tədarükünə dair müqavilə imzaladığı bildirilir. Bu barədə iyunun 18-də Fransanın müdafiə naziri Sebastyan Lekornu “X” (Twitter) sosial şəbəkəsində məlumat paylaşıb.

Azərbaycanın Müdafiə Nazirliyi fransalı nazirin açıqlamasına reaksiya verib. Nazirlik bildirib ki, Azərbaycan tərəfinin xəbərdarlığına rəğmən Fransanın Ermənistanı öldürücü və hücum təyinatlı artilleriya qurğuları və digər silah növləri ilə təchiz etməsi Parisin Cənubi Qafqazda təxribatçı fəaliyyət aparmasının növbəti sübutudur.

“Bəyan edirik ki, Cənubi Qafqaz regionunda vəziyyətin gərginləşməsinə və yeni müharibə ocağının yaranmasına görə məsuliyyəti tam şəkildə revanşist siyasət yürüdən Ermənistan rəhbərliyi və Makron diktaturası daşıyacaqdır”,-deyə nazirlik vurğulayıb.

Yerevan Bakının Ermənistanla Fransa arasında hərbi-texniki əməkdaşlığa reaksiyasını müəmmalı adlandırıb. Bu barədə Ermənistanın Xarici İşlər Nazirliyinin (XİN) iyunun 19-da yaydığı bəyanatda qeyd olunur. Ermənistan Xarici İşlər Nazirliyi hesab edir ki, hər bir ölkənin döyüşə hazır və müasir hərbi texnika ilə təchiz edilmiş orduya sahib olmaq hüququ var.

Bəyanatda iddia olunur ki, Azərbaycan COP29-dan sonra Ermənistanla sülh sazişinin imzalanması prosesini pozmaq üçün əlindən gələni edəcək və Ermənistana qarşı yeni təcavüzə başlayacaq.

Azərbaycan Xarici İşlər Nazirliyi Ermənistan XİN-nin bəyanatında deyilənləri rədd edib.

Bu arada İyunun 18-də Türkiyə prezidenti Ərdoğan ilə Ermənistanın baş naziri Paşinyan arasında telefon danışığı olub. Türkiyə prezidentinin mətbuat xidmətinin məlumatına görə, söhbət zamanı hər iki lider Türkiyə və Ermənistan arasında ilkin şərt olmadan münasibətlərin tam şəkildə normallaşdırılması üçün siyasi iradələrini vurğulayıblar.

“Bu kontekstdə liderlər iki ölkənin xüsusi nümayəndələri arasında danışıqların davam etdirilməsinin vacibliyini qeyd edib və bu günə qədər razılaşdırılmış məsələləri təsdiqləyiblər. Liderlər həmçinin Türkiyə və Ermənistanın yüksək səviyyəli rəsmiləri arasında davam edən dialoqu məmnunluqla qeyd ediblər”, - Türkiyə tərəfinin bəyanatında deyilir.

Bütün bunlar barədə siyasi şərhçi Xaləddin İbrahimli Kamran Mahmudovun təqdimatında yayımlanan “Çətin sual” verilişində danışır.