Azərbaycanın adı yenə rüşvət qalmaqalında? – Nahid Cəfərov Çətin sualda

Almaniyanın Münhen Prokurorluğu keçmiş deputatlar – Aksel Fişerə və Eduard Lintnerə qarşı ittiham irəli sürüb. Onların Azərbaycan hökumətindən rüşvət aldıqları bildirilir. Söhbət milyonlarla dollardan gedir. Xəbəri “Spiegel” yayıb.

Sayt rəsmi orqanlara istinadən yazır ki, Münhen Prokurorluğunda məmurların rüşvətxorluq və korrupsiyada şübhəli bilinməsi ilə bağlı ittiham irəli sürülüb.

Bildirilir ki, Fişer və Lintnerə qarşı iş Almaniya Xristian Demokrat İttifaqının (CDU) üzvü Karin Strenzlə də bağlıdır. Lakin Strenz 2021-ci ildə tətildən qayıdarkən gözlənilmədən vəfat edib.

Dövlət ittihamçısı Lintneri Azərbaycandan pul almaqda və onu parlament üzvlərinə, o cümlədən Strenzə ötürməkdə ittiham edir. Xəbərdə deyilir ki, pul müqabilində deputatlar Azərbaycanın maraqlarına uyğun qərarlar verməli imişlər. Bu, Avropa Şurası Parlament Assambleyasında səsvermənin nəticələrinə xüsusi təsir etməli idi.

Prokurorluğun məlumatına görə, Strenz pul müqabilində “Azərbaycanın tələblərinə uyğun hərəkət edəcəyini” vəd edib.İttiham ondan ibarətdir ki, Fişer də pul müqabilində Bakının maraqlarından çıxış edib. Bildirilir ki, o, Karin Strenz üçün 150.000 avro rüşvət alıb. Onun əvvəllər də Azərbaycandan rüşvət aldığı deyilir.

Almaniyanın Avropa Şurası Parlament Assambleyasındakı (AŞPA) deputatı, Azərbaycan nümayəndə heyətinin səsvermə hüququndan məhrum edilməsi ilə bağlı qətnamənin müəllifi Frank Şvabe də məsələyə “X” səhifəsində münasibət bildirib:

“Karin Strenz üçün 149 min avro? Ən azından ittiham tərəfi belə deyir. Hətta mən belə yüksəklikdə məbləğ gözləmirdim”.

O, “X” səhifəsində Azərbaycanın Almaniyadakı səfiri Nəsimi Ağayevi də taq edib və ona sual ünvanlayıb:

“Bu pulların ödənildiyini istisna edə bilərsinizmi, cənab Nəsimi Ağayev?”

Azərbaycanın Xarici İşlər Nazirliyi hələlik məsələ ilə bağlı mövqe bildirməyib.

Baş verənlərlə bağlı keçmiş diplomat Nahid Cəfərov Kamran Mahmudovun təqdimatında yayımlanan “Çətin sual” verilişində danışır.