Bakıda atışma, Qarabağda gərginlik. Nə baş verir? – Elxan Şahinoğlu Çətin sualda

Bakı/06.03.23/Turan: Ötən həftənin şənbə günü Bakının Xətai rayonundakı Bravo hipermarketində silahlı basqın zamanı gözətçi Rüfət Həşimov öldürüldü. Eyni zamanda “Unibank”ın əməkdaşı Samir Şeydayev ağır yaralandı. Daxili İşlər nazirliyinin rəsmisinin verdiyi məlumata görə, Bravo hipermarketinə  hücum edənlərdən biri öldürülüb, ikincisi isə tutulub.

Martın 5-də Azərbaycan Müdafiə Nazirliyinin yaydığı məlumata görə, Xankəndi-Xəlfəli-Turşsu torpaq yolundan istifadə edilməklə Ermənistan Respublikasından hərbi ləvazimatların, silah-sursatın  və şəxsi heyətin Rusiya sülhməramlı kontingentinin müvəqqəti yerləşdiyi Azərbaycan ərazilərinə daşınmasının həyata keçirilməsi barədə operativ məlumatlar daxil olub. Məlumatın yoxlanması məqsədilə qanunsuz hərbi daşınmalar həyata keçirən nəqliyyat vasitələrinin Azərbaycan Ordusunun bölmələri tərəfindən saxlanılaraq yoxlanılmasına cəhd göstərilib.

Qarşı tərəfdən atəş açılıb və baş vermiş atışma nəticəsində hər iki tərəfdən həlak olan və yaralananlar var. Azərbaycan Ordusunun hərbi qulluqçuları Əlibəyli Şəhriyar Ramiz oğlu və Hüseynov Eşqin Cəmil oğlu şəhid olublar.

Nə baş verir? Bu iki hadisənin bir-biri ilə əlaqəsi ola bilərmi?

Siyasi şərhçi Elxan Şahinoğlu Kamran Mahmudovun təqdimatında yayımlanan “Çətin sual” verilişində bu barədə danışır.