Berlin görüşünün nəticələri, Avropanın sanksiya çağırışları... - Əhməd Əlili saat 16:00-da Çətin sualda

Berlində Azərbaycan və Ermənistan xarici işlər nazirləri arasında danışıqlar başa çatıb.Azatutyun Ermənistan XİN-in məlumatına istinadla yazır ki, Ceyhun Bayramov və Ararat Mirzoyan son iki gündə iki ölkə arasında mümkün sülh müqaviləsinin müddəalarını müzakirə ediblər.

Avropa Parlamentinin fevralın 28-də açıqlanmış “Ümumi təhlükəsizlik və müdafiə siyasətinin həyata keçirilməsi” adlı illik hesabatında Ermənistana Avropa Sülh Fondu vasitəsilə dəstək verilməsinə çağırış edilir. Avropalı parlamentarilər Ermənistanda Azərbaycanla sərhəddə yerləşdirilmiş müşahidəçilərin sayının artırılması, bu missiyanın mandatının gücləndirilməsi, missiya müddətinin uzadılması və onun potensial olaraq Ermənistanın Türkiyə ilə sərhədini də əhatə etməsini təklif ediblər.

Hesabatda deyilir ki, Avropa Parlamenti Azərbaycanın Qarabağ erməniləri üzərinə “səbəbsiz və əvvəlcədən planlaşdırılmış hücumunu” pisləyir.Bu hesabatda Azərbaycan beynəlxalq qanunu və insan haqlarını kobud şəkildə pozmaqda ittiham olunur, Qarabağda baş verənlər isə “əslində de facto etnik təmizləmə kimi qiymətləndirilə biləcək” hadisə adlandırılır.

Sənəddə deyilir ki, Azərbaycanın hərəkətləri nəticəsiz qala bilməz və bu səbəbdən çoxsaylı atəşkəs pozuntuları üçün məsuliyyət daşıyan Azərbaycan rəsmilərinə sanksiyalar elan olunmalı, Azərbaycanla Aİ arasında Enerji Anlaşması Memorandumu ləğv edilməli, Azərbaycanla yeni tərəfdaşlıq sazişi üçün danışıqlar dayandırılmalıdır.

Hesabatda deyilir ki, Ermənistanın ərazi bütövlüyünə hər hansı hərbi təcavüz təqdirində prezident Əliyevin “hərbi və siyasi” əhatəsinə hədəfli və fərdi sanksiyalar elan olunmalı, Azərbaycandan neft və qaz idxalı dayandırılmalıdır.

Azərbaycan Avropa Parlamentinin hesabatına kəskin reaksiya verib. Xarici İşlər Nazirliyi və Milli Məclis hesabatı “qarayaxma və qərəzli” adlandırıblar.

Yeri gəlmişkən, fevralın 28-də Almaniya İqtisadiyyatının Şərq Komitəsinin sədri Mixael Harmsın başçılıq etdiyi nümayəndə heyətini qəbul edən Prezident İlham Əliyev deyib ki, onun ölkəsinin Ermənistana hücum etmək planı yoxdur.

Siyasi analitik Əhməd Əlili Kamran Mahmudovun təqdimatında yayımlanan “Çətin sual” verilişində bu barədə danışır.