Çətinliklərə baxmayaraq, «Azadlıq» azad mətbuat prinsiplərinə sadiqdir – redaktor

Bütün çətinliklərə və təzyiqlərə baxmayaraq, “Azadlıq” qəzeti azad mətbuat prinsiplərinə sadiq qalmağa və həqiqətə qulluq etməyə davam edir. Eyni zamanda, qəzetin vəziyyəti Azərbaycanda azad mətbuatın ümumi vəziyyətinin göstəricisidir.

Bu fikri Milli Mətbuat Günü ilə əlaqədar Turan agentliyinin Çətin Sual verilişinə müsahibəsində “Azadlıq” qəzetinin baş redaktorunun birinci müavini Rəhim Hacıyev bildirib.

“Təəssüf ki, bu gün Mətbuat Gününü biz yenə uzun illərdir davam edən ağır vəziyyətdə - əməkdaşların həbsləri və döyülməsi, astronomik məhkəmə cərimələri, qəzetin yayılmasına olan maneələr şəraitində qeyd edirik.

Ölkənin aparıcı jurnalistlərindən biri, saxta xuliqanlıq ittihamı ilə həbs və mühakimə edilmiş Seymur Həzi həbsdə qalmaqdadır.

Maliyyə problemləri ilə əlaqədar redaksiyanın əməkdaşlarına 100 min manatdan çox əmək haqqı borcu var və qəzet yalnız onların fədakarlığı sayəsində nəşr olunur”, deyə Hacıyev bildirib.

O qeyd edib ki, “Azadlıq” dövlətin aztirajlı və hakimiyyətyönlü qəzetlərin saxlanması üçün əlaçıqlıqla verilən maliyyə dəstəyindən məhrumdur.

Normal demokratik dövlətdə mətbuat dövlətin köməyinə ehtiyac duymamalıdır. KİV-in biznes qurumları kimi işləmək imkanı olmalıdır və özlər tirajlar və reklam ilə qazanmalıdır.

““Azadlıq” qzəeti uzun illərdir bu mənbələrdən məhrumdur, belə ki, biznesin bizə reklam verməsini qadağan ediblər”, deyə o bildirib.

İqtisadi cəhətdən boğma prosesi çoxdan davam edir və 90-cı illərin sonlarında KİV-in 70%-i müstəqil idisə, bu gün onların əksəriyyəti təzyiqə tab gətirməyərək, hakimiyyətə işləyir.

“Təəssüf ki, azad media ictimaiyyəti artıq kiçik bir qüvvəyə çevrilib. Amma azsaylı vicdanlı jurnalistlər öz mübarizəsini davam etdirir və cəmiyyətin onlara ehtiyacı var.

“Azadlıq” qəzetinin on-line versiyasına gündəlik baxışlar on minlərlə orijinal İP-dən ibarət olur ki, bu da insanların azad mətbuata ehtiyacından, müstəqil və obyektiv mənbələrə olan maraqdan xəbər verir”, deyə Hacıyev qeyd edib. -06D-