Əziz Orucova qarşı qaçaqmalçılıq ittihamı, “Kanal 13”-ə qoyulan blok... – Anar Orucov Çətin sualda

Bakı/22.12.23/Turan: Noyabrın 27-də həbs olunmuş jurnalist, “Kanal 13” internet televiziyasının icraçı direktoru Əziz Orucova qarşı Cinayət Məcəlləsinin 188.2 (Mülkiyyət, istifadə və ya icarə hüququ olmadan torpaq sahəsi üzərində özbaşına tikinti və ya quraşdırma işləri aparma) maddəsilə ittiham irəli sürülmüşdü. Dekabrın 19-da  isə Əziz Orucova Cinayət Məcəlləsinin 206.3.2 (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsilə əlavə ittiham verildi.

Bundan başqa Əziz Orucovun ailə üzvlərinin bank hesablarına həbs qoyulub. Həyat yoldaşı Lamiyə Orucovanın sözlərinə görə, Əziz Orucovun həm həyat yoldaşının bank hesabı, həm də anasının pensiya kartı bloklanıb.

Əziz Orucovun həbsindən sonra Daxili İşlər Nazirliyi onun rəhbərlik etdiyi media orqanına girişin bloklanması məsələsini qaldırıb. Məhkəmə iddianı təmin edib və bloklanma qərarı verib.

Bütün bunlar barəsində “Kanal 13” internet televiziyasının Almaniyada yaşayan rəhbəri Anar Orucov Kamran Mahmudovun təqdimatında yayımlanan “Çətin sual” verilişində danışır.