Fransa-Azərbaycan münasibətlərinin daha da gərginləşməsinin səbəbi nədir? – Əhməd Əlili saat 16:00-da Çətin sualda

Bakı/28.12.23/Turan: Azərbaycanın Fransadakı səfirliyinin iki əməkdaşı “persona-non-grata” (arzuolunmaz şəxs) elan edilib.

Bu barədə dekabrın 27-də Fransa Xarici İşlər Nazirliyi məlumat yayıb.

“Rəsmi Paris Azərbaycanın Fransanın Azərbaycandakı səfirliyinin diplomatik heyətinin iki əməkdaşını “persona-non-grata” (arzuolunmaz şəxs) elan etməsi ilə bağlı qərarını nəzərə alıb. O, Azərbaycanın öz qərarını əsaslandırdığı ilə bağlı iddialarını qəti şəkildə rədd edir. Fransa cavab tədbiri olaraq Azərbaycanın Fransadakı səfirliyinin iki əməkdaşını “persona-non-grata” (arzuolunmaz şəxs) elan edib”, - deyə nazirlik əlavə edib.

Ancaq rəsmi Paris Azərbaycan səfirliyinin “persona-non-grata” (arzuolunmaz şəxs) elan olunan əməkdaşlarının adlarını açıqlamayıb.

Dekabrın 26-da Fransanın Azərbaycandakı səfiri Ann Buayon Xarici İşlər Nazirliyinə çağırılıb.

Ona Fransa səfirliyinin iki əməkdaşının diplomatik statuslarına uyğun olmayan və “Diplomatik əlaqələr haqqında” 1961-ci il Vyana Konvensiyası ilə ziddiyyət təşkil edən fəaliyyət göstərdikləri bildirilib.

Eyni zamanda, onların Azərbaycan hökuməti tərəfindən “persona-non-grata” (arzuolunmaz şəxs) elan olunduğu Fransa səfirinin diqqətinə çatdırılıb. Səfirə nota təqdim olunub.

Baş verənləri siyasi analitik Əhməd Əlili Kamran Mahmudovun təqdimatında yayımlanan “Çətin sual” verilişində şərh edir.