Hüquq müdafiəçisi: Hakimiyyətin münasibəti dəyişmədikcə..

Bakı/19.03.21/Turan:  Ölkədə siyasi məhbus olmaması üçün hakimiyyət bu məsələyə baxışını dəyişdirməli, insan haqları və azadlıqlarına hörmət etməlidir. Hüquq müdafiəçisi Samir Kazımlı bunu “Turan”ın  “Çətin sual” proqramının 2021-ci il 19 mart buraxılışnda  martın 18-də imzalanmış əfv fərmanı ilə bağlı şərhində bildirib.

S.Kazımlı hesab edir ki, bu il martın 18-də imzalanmış əfv fərmanı da siyasi məhbus məsələsini həll etməyib: “Yenə də sözün mənfi mənasında “qeyri-adilik” gördük. Eyni iş üzrə həbs edilən Azərbaycan Xalq Cəbhəsi Partiaysının bəzi üzvləri həbsdən azad olundu, bəziləri isə həbsdə saxlandı. 2015-ci il Nardaran hadisələrilə bağlı buraxılanlar olsa da həbsdə qalanlar da vardır. Eləcə də “Gəncə işi” ilə bağlı bəziləri azadlığa çıxsalar da çoxu hələ  həbsdədir. Hazırda həbsdə  50-yə qədər siyasi məhbus var ki, bu da az rəqəm saıylmaz”, deyə S.Kazımlı bildirib.

Hüquq müdafiəçisi deyir ki, İkinci Qarabağ müharibəsi kontekstində bu məsələnin həll olunacağına ümid yaranmışdı, amma hakimiyyətin sonrakı münasibəti bu ümidlərə də son qoydu.

Onun fikrincə, bu problemin həllini tapması üçün hakimiyyətin insan haqları və azadlıqlarına münasibəti dəyişməlidir, əksinə bu münasibət dəyişmədikcə siyasi məhbus problemi həllini tapmayacaq. O, əlavə edir ki, indiki münasibətlər qaldıqca problem nəinki həll olunmayacaq, əksinə, siyasi məhbus sayı daha da aratcaq.

S.Kazımlı hesab edir ki, məhkəmələr müstəqil olmadıqca, sifarişlə işlədikcə siyasi məhbus məsələsi həllini tapmayacaq, bunun üçün ilk növbədə məhkəmələr müstəqil olmalıdırlar.

Xatırladaq ki, 2021-ci il martın 18-də ölkədə əfv fərmanı imzalanıb. 625 məhbus həbsdən azad edilib. Onlardan 38 nəfər siyasi məhbuslardır. Hakimiyyət isə ölkədə siyasi məhbus olmadığını deyir. Həbs olunanların siyasi əqidələrinə görə yox,  konkreyt əmələ görə həbs edildiklərini bildirir.-05B-