Prezidentin AŞPA-ya və Ermənistana xəbərdarlığı... – Rauf Mirqədirov saat 16:00-da Çətin sualda

Prezident İlham Əliyev cümə axşamı Parlamentlərarası İttifaqın baş katibi Martin Çunqonqu qəbul edərkən Avropa Şurası Parlament Assambleyasının Azərbaycan nümayəndə heyətinin səsdən məhrum edilməsi barədə qərarına toxunub. Əliyev deyib ki, bu, azlıqların təşəbbüsü idi. Onun sözlərinə görə, bu qərar parlament ənənələrinə ziddir.

Prezident bildirib ki, Azərbaycan nümayəndə heyətinin hüquqları bərpa edilməlidir. “Əgər bu, baş verməsə, Azərbaycanın Avropa Şurası və Avropa İnsan Haqları Məhkəməsində iştirakı məsələsinə yenidən baxılacaq”.

Dövlət başçısı həmçinin Azərbaycanla Ermənistan münasibətlərinə də toxnub. O deyib ki, iki ölkə arasında artıq de-fakto sülh mövcuddur və iki ölkənin sərhədində bir neçə aydır sülh şəraiti hökm sürür. Amma bu prosesin məntiqi sonluğa çatdırılması üçün sülh müqaviləsi imzalanmalı və Ermənistanın Azərbaycana qarşı ərazi iddialarına son qoyulmalıdır.

“Ermənistanın müstəqillik haqqında bəyannaməsində Azərbaycanın Qarabağ bölgəsinin Ermənistanla birləşdirilməsinə və Azərbaycanın ərazi bütövlüyünün pozulmasına birbaşa çağırışlar var və bu sənədə istinadlar da Ermənistanın Konstitusiyasında öz əksini tapıb”, - Əliyev deyib.

Həmçinin Ermənistanın digər normativ-hüquqi sənədlərində Azərbaycana qarşı ərazi iddiaları var.

“Bu iddialara son qoyulduğu, Ermənistan Konstitusiyasında və digər normativ-hüquqi sənədlərdə dəyişikliklər edildiyi halda sülhə nail oluna bilər”, - Əliyev deyib.  O, Ermənistanda bu mövzuda ölkədaxili müzakirələrin başlanmasını müsbət addım kimi qiymətləndirib və deyib ki, bu, sülh prosesinin tezliklə yekunlaşdırılması üçün yaxşı imkan yarada bilər.

Siyasi şərhçi Rauf Mirqədirov Kamran Mahmudovun təqdimatında yayımlanan “Çətin sual” verilişində bu barədə danışır.