Qubad İbadoğlu, Nazim Bəydəmirli və Bəxtiyar Hacıyevdən gələn xəbərlər... – Rüfət Səfərov Çətin sualda

Bakı/01.09.23/Turan: Avqustun 25-də həbsdə olan Azərbaycan Demokratiya və Rifah Partiyasının sədri Qubad İbadoğluna qarşı Cinayət Məcəlləsinin 167-3.1 (Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddəsi ilə yeni ittiham elan edilib. Bu barədə vəkil Zibeydə Sadıqova bildirib.

Həbsdə olan fəal Bəxtiyar Hacıyev və hüquq müdafiəçisi Novella Cəfəroğlu arasında Soros fondu ilə bağlı söz atışmaları yaşanıb.  Sosial şəbəkələrdə yazılanlara görə, Novella Cəfəroğlu Bəxtiyar Hacıyevi Soros fondundan pul almaqda ittiham edib. Hüquq müdafiəçisi belə söz demədiyini, kiminsə onun adından istifadə etdiyini bildirib.

Həbsdə olan iqtisadçı, iş adamı Nazim Bəydəmirli Nazim Bəydəmirli həbsindən 40 gün sonra ilk dəfə ailəsi ilə görüşə bilib.  “Turan”a danışanhəyat yoldaşı Fəridə Bəydəmirli deyib ki, Nazim gümrah görünürdü, saxlanma şəraitindən şikayəti olmadı, dediyinə görə, tibbi müayinədən keçib, gərəkli dərmanlarla təmin olunub. Bundan əvvəl Nazim Bəydəmirlinin əlavə cinayət işinin açılacağı ilə təhdid edildiyi bildirilirdi.

Vəkillər Kollegiyasından vəkil Zibeydə Sadıqovanı Rəyasət Heyətinin iclasına çağırıblar. Səbəb kimi barəsində rəy verildiyi bildirilib. Vəkilin sözlərinə görə, onun barəsində intizam tədbiri görmək istəyirlər. O düşünür ki, bu, insan haqlarını müdafiə etdiyinə görədir. Bir müddət əvvəl digər bir vəkil Elçin Sadıqovun vəkillikdən çıxarılması ilə bağlı qərar qəbul olunub.

Müsəlman Birliyi Hərəkatının (MBH) İdarə Heyətinin üzvü Ağəli Yəhyayevin yaxınları bir sutkaya yaxındır ki, ondan heç bir xəbər ala bilmədiklərini deyirlər. Son bir neçə ayda yüzlərlə dini inanclının, o cümlədən Müsəlman Birliyi Hərəkatının onlarla üzvünün həbs olunduğunu nəzərə alaraq, ailə üzvləri onun da polislər tərəfindən saxlandığlnı ehtimal edir.

Bütün bunlar barədə hüquq müdafiəçisi Rüfət Səfərov Kamran Mahmudovun təqdimatında yayımlanan “Çətin sual” verilişində danışır.