Rəsmi Bakının Qarabağ ermənilərinə jestinə Araikin cavabı nə oldu? – Üzeyir Cəfərov Çətin sualda

Bakı/03.03.23/Turan: Milli Məclisin deputatı Ramin Məmmədov Qarabağ bölgəsində yaşayan erməni sakinlərlə təmaslar üzrə məsul şəxs kimi martın 1-də Xocalı şəhərində, Rusiya sülhməramlı kontingentinin qərargahında Qarabağ bölgəsində yaşayan erməni sakinlərin təmsilçiləri ilə görüşüb.

Görüş zamanı Azərbaycan Konstitusiyasına və qanunlarına uyğun olaraq Qarabağ bölgəsində yaşayan erməni sakinlərin reinteqrasiyasına dair ilkin müzakirələr aparılıb. Bu təmasların davam etdiriləcəyi bildirilir. Ermənistan tərəfinin yaydığı məlumata görə, görüşdə humanitar məsələlər və infrastruktur məsələləri, xüsusən insanların, nəqliyyat vasitələrinin və yüklərin Laçın dəhlizindən fasiləsiz hərəkətinin bərpa edilməsi, Qarabağın Ermənistandan elektrik və qaz təchizatının bərpa edilməsi, habelə Kaşen (Qızılbulaq) mədəninin istismarı məsələləri müzakirə olunub. Görüşdə iştirak edən erməni nümayəndə isə Samvel Şahramanyandır. O, qondarma rejimin “təhlükəsizlik şurasının katibi”dir.

Ehtimallara görə, Qarabağ bölgəsində yaşayan erməni sakinlərlə növbəti müzakirələr Bakıda, Gəncədə və yaxud Ağdamda da baş tuta bilər. Xocalıda Bakı nümayəndələrinin Qarabağ erməniləri ilə görüşündən bir neçə saat sonra separatçıların lideri Araik Arutyunyan “hökumətin iclası”nda yeni “dövlət naziri” Nersisyanı təqdim edib. Sitat: “Bir daha qeyd etmək istəyirəm ki, çətinliklərə və bizə göstərilən təzyiqə baxmayaraq, biz "artsax" hərəkatının ideyalarına sadiq qalırıq və müstəqillik yolundan geriyə doğru bir addım belə atmırıq. Bütün məsuliyyətimlə demək istəyirəm ki, Azərbaycanla istənilən inteqrasiya prosesi istisnadır. Amma bu, o demək deyil ki, biz infrastruktur və humanitar xarakterli məsələlərin həlli üçün əlaqələrdən yayınacağıq”, - deyə o bildirib.

Baş verənlərlə bağlı siyasi və hərbi ekspert Üzeyir Cəfərov Kamran Mahmudovun təqdimatında yayımlanan “Çətin sual” verilişində danışır.