Praqa Çexiya sahibkarlarının Azərbaycandakı layihələrini dəstəkləyəcək

Bakı/03.03.23/Turan: Martın 2-3-də Praqada Azərbaycan və Çexiya arasında iqtisadi əməkdaşlıq, elmi-texniki və mədəni əməkdaşlıq üzrə Birgə Komissiyanın çoxdan gözlənilən 5-ci iclası keçirilib.

Çexiyanın Azərbaycandakı Səfirliyindən verilən məlumata görə, görüşdə Çexiya nümayəndə heyətinə sənaye və ticarət nazirinin müavini Petr Tresnak, Azərbaycan nümayəndə heyətinə isə iqtisadiyyat nazirinin müavini Sahib Məmmədov rəhbərlik edib.

Bu il sessiyanın əsas diqqəti biznes və investisiya əməkdaşlığı, ekoloji texnologiyalar və enerjiyə yönəldilib.

Praqada hesab edirlər ki, Azərbaycan-Çexiya məsləhətləşmələri iki dövlət arasında iqtisadi münasibətlərin pandemiyadan sonrakı yüksəlişin yaşandığı bir vaxtda gələcək əməkdaşlığa əlavə təkan verəcək.

Çexiya  nəqliyyat əlaqələri və enerji sektorlarında iştirakını genişləndirmək imkanlarını araşdırır və Azərbaycanda öz şirkətləri üçün yeni investisiya imkanlarına ümid edir. Əvvəllər bir qrup Çexiya şirkəti Bakı-Tbilisi-Qars dəmir yolu dəhlizinin Azərbaycan hissəsinin yenidən qurulmasında uğurla iştirak edib,

Bu il Çexiya hökuməti Azərbaycan bazarında çex sahibkarlarına kömək etmək üçün bir neçə layihəyə dəstək vermək qərarına gəlib.—0--