Reyestrin ikinci mərhələsi, xarici dövlətlərdəki partiyalarla əməkdaşlığa görə cərimələr…- Gülağa Aslanlı Çətin sualda

Bakı/18.08.23/Turan: Müsavat və REAL partiyaları yenilənmiş reyestr siyahılarını Ədliyyə Nazirliyinə təqdim ediblər. Bu barədə avqustun 17-də hər iki partiyanın sədri “Facebok” səhifələrində məlumat yayıblar.

Müsavat Partiyasının başqanı Arif Hacılı “Facebook” səhifəsində yazıb ki, onlar üzvlərinin bir qisminin siyahılarını nazirliyin yazılı və şifahi qeydlərini nəzərə alaraq hazırlayıblar:

“Bu dəfə hər ehtimala qarşı daha minə qədər üzvümüzün adları siyahıya əlavə olundu”.

Bu arada Azərbaycanda siyasi partiyalar haqqında qanunvericiliyin pozulmasına görə yeni cərimələr müəyyənləşib. Prezident İlham Əliyev bununla bağlı avqustun 16-da İnzibati Xətalar Məcəlləsinə dəyişiklik edilməsi haqqında qanuna dəyişikliklərin təsdiq edilməsi ilə bağlı fərman imzalayıb.

Dəyişikliyə əsasən, Azərbaycanda xarici dövlətlərin siyasi partiyalarının, habelə onların bölmələrinin və təşkilatlarının təsis edilməsinə və ya fəaliyyətinə görə fiziki şəxslər 700 manatdan 1000 manatadək, vəzifəli şəxslər isə 1 500 manatdan 2 000 manatadək, hüquqi şəxslər isə 6 000 manatdan 8 000 manatadək cərimə olunacaq.

Bundan əlavə göstərilir ki, partiyanın digər ölkələrin siyasi partiyaları ilə sazişin bağlanması və ya siyasi partiyaların beynəlxalq ittifaqlarına üzvlüyə daxil olması barədə “Siyasi partiyalar haqqında” Qanunla müəyyən edilmiş müddətdə müvafiq icra hakimiyyəti orqanının müəyyən etdiyi orqana (quruma) məlumat verməməsinə görə vəzifəli şəxslər 500 manatdan 700 manatadək, hüquqi şəxslər isə 1 500 manatdan 2 000 manatadək cərimə ediləcək.

Baş verənlərlə bağlı Müsavat Partiyasının başqan müavini Gülağa Aslanlı Kamran Mahmudovun təqdimatında yayımlanan “Çətin sual” verilişində danışır.