Sanksiya xəbərləri fonunda Azərbaycanda baş verən həbslər... – Rüfət Səfərov Çətin sualda

Seçkilərin Monitorinqi və Demokratiyanın Tədrisi (SMDT) Mərkəzinin rəhbəri Anar Məmmədliyə qarşı Azərbaycan CM-in 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Anar Məmmədli ötən gün günorta saatlarında  saxlanılmışdı. Daha sonra onun özünün və valideynlərinin yaşadığı mənzillərdə axtarış aparılmışdı. Məmmədlinin ailə üzvləri onun Abzas Media-nın işi üzrə prosesə cəlb edildiyini bildiriblər. O, bu işin səkkizinci fiqurantı oldu.

Bundan bir neçə gün əvvəl aprelin 18-də Meclis.info saytının rəhbər İmran Əliyev saxlanılıb. Aprelin 19-da məhkəmə Əliyevi iki ay müddətinə həbs edib. Məhkəmədə bildirib ki, etirafedici ifadə verməsi üçün ona elektrik cərəyanı veriblər,  döyüblər, işgəncə veriblər. Aprelin 26-da ona qarşı yeni ittiham irəli sürülüb. İstintaq onu Azərbaycan Cinayət Məcəlləsinin 206.3.1-ci maddəsini (dəfələrlə törədilmiş qaçaqmalçılıq) pozmaqda ittiham edir. Bundan əvvəl İmran Əliyev Cinayət Məcəlləsinin 206.3.2-ci (bir qrup şəxs tərəfindən törədilmiş qaçaqmalçılıq) maddəsilə ittiham olunub.

İctimai fəal Abid Qafarova məxsus evinə aprelin 29-da basqın olduğu deyilir. Bu barədə A.Qafarovun özü məlumat verib. Ötən il xarici ölkələrdən birinə köçən fəalın sözlərinə görə, evdə yaşayan yaşlı qaynana və qaynataya mülki geyimli şəxslər təzyiq göstərib. O, hesab edir ki, bu hadisə müəllif olduğu "Andaluniya" adlı kitabla əlaqəlidir. Onun sözlərinə görə, aprelin 27-də keçirilən sərgidə həmin kitabın 42 nüsxəni mülki geyimli şəxslər tərəfindən müsadirə olunub. A.Qafarov qeyd edib ki, həmin kitabda 2017-ci ildə baş verən Tərtər hadisələri təsvir edilib.

Baş verənlər barədə hüquq müdafiəçisi, “Müdafiə xətti” hüquq müdafiə təşkilatının rəhbəri Rüfət Səfərov Kamran Mahmudovun təqdimatında yayımlanan “Çətin sual” verilişində danışır.