Türkiyədə zəlzələnin yaratdığı çətinliklər – Seymur Kazımov və Türkiyədən canlı bağlantılar Çətin sualda

Bakı/21.02.23/Turan:  Türkiyənin cənubundakı Hatay vilayətində fevralın 20-də axşam saatlarında iki zəlzələ qeydə alınıb. Məlumata görə, 6 nəfər ölüb, 300-ə yaxın insan xəsarət alıb. 6,4 bal gücündə birinci təkan yerli vaxtla saat 20.04-də, ikincisi isə 5,8 bal gücündə saat 20.07-də ​​qeydə alınıb. Zəlzələnin episentrləri Dəfnə və Samandağ ərazilərində olub. Birinci zəlzələnin mənbəyi 16,7 km, ikincisi isə 7 km dərinlikdə olub.

Zəlzələ Suriya, Livan, İordaniya, İraq, Fələstin və İsraildə də hiss olunub.

Fövqəladə Hallar Agentliyi AFAD-ın məlumatına görə, İsgəndərun şəhərində üçmərtəbəli boş bina uçub. Vilayətin inzibati mərkəzi - Antakyada daha iki bina dağılıb.

Ötən axşam baş vermiş zəlzələ ilə bağlı Türkiyədən hadisə yerindən canlı bağlantılar olacaq. Fevralın 6-da baş vermiş ard-arda iki zəlzələnin yaratdığı çətinliklər barədə isə həmin ərazilərdən yenicə qayıtmış müstəqil jurnalist Seymur Kazımov Kamran Mahmudovun təqdimatında yayımlanan “Çətin sual” verilişində danışır. --0--