“Agentstvo” media qrupunun məlumatına görə, ötən həftə Rusiya Ukraynanın 196 kvadrat kilometr ərazisini işğal edib

Reuters: MOSKVA (“Reuters”) – Açıq mənbələrdən Ukrayna xəritələrini təhlil edən Rusiyanın "Agentstvo" media qrupunun məlumatına görə, Rusiya oktyabrın 20-dən 27-dək bir həftə ərzində Ukrayna ərazisinin 196,1 kvadrat kilometrini işğal edib və bu, Rusiya qoşunlarının bu il ən sürətli həftəlik irəliləməsidir.

Rusiya rəsmilərinin sözlərinə görə, Ukraynada 2,5 illik müharibə özünün ən təhlükəli mərhələsinə qədəm qoyur, çünki rus qoşunları irəliləyir və Qərb müharibənin necə bitəcəyi barədə düşünür.

Açıq mənəblərdəki məlumatlara görə, prezident Vladimir Putinin əmri ilə 2022-ci ilin fevralında Ukraynaya daxil olan Rusiya qoşunları sentyabr ayında 2022-ci ilin martından bəri ən yüksək sürətlə irəliləyib, baxmayaraq ki, Ukrayna ordusu Kursk vilayətinin bir hissəsini zəbt edib.

Rusiyada “xarici agent” hesab edilən agentlik “Telegram” kanalında bildirib ki,  “Rusiya ordusu ən azı bu ilin əvvəlindən bir həftədə bu qədər sürətli irəliləyişə nail olmamışdı”.

Məlumatda deyilir ki, bu nəticəyə gəlmək üçün açıq mənbəli Ukrayna kəşfiyyat analitiklərinin “Deep State” analitiklərinin işlənməmiş məlumatlarından istifadə edilib.

“Agentstvo” bildirib ki, ötən həftə Rusiya ordusu Uqledar şəhəri yaxınlığında 95 kvadrat kilometr, Pokrovsk şəhəri yaxınlığında isə 63 kvadrat kilometr ərazini işğal edib. Hər iki bölgə Ukraynanın şərqində, Donbasda yerləşir.

 “Agentstvo”  həmçinin bildirib ki, Ukraynanın Donbasdakı müdafiəsi Kiyevin Rusiyanın Kursk bölgəsinə qoşun yeritmək qərarı ilə zəifləyib, çünki Rusiya Donbasdan Kurska qoşun köçürməyib.

Ukrayna ərazisinin beşdə birinə nəzarət edən Moskva qüvvələrinin irəliləməsi Rusiyanın insan və texnika baxımından böyük say üstünlüyünü göstərir. Ukrayna onu dəstəkləyən Qərb müttəfiqlərindən onu daha çox silahla təmin etməyi xahiş edir.

Rusiya 2014-cü ildə Ukraynadan ilhaq etdiyi Krıma, Donbasın təxminən 80%-nə - Donetsk və Luqansk vilayətlərini əhatə edən kömür və polad mədəni zonasına, Zaporojye və Xerson vilayətlərinin isə 70%-dən çoxuna nəzarət edir.