Almaniya Xarici İşlər Nazirliyi X sosial şəbəkəsində Rusiyanın dezinformasiya kampaniyasını üzə çıxarıb

DW:  Almaniyanın həftəlik “Der Spiegel” nəşrinin məlumatına görə, Almaniya Xarici İşlər Nazirliyi İlon Maskın X sosial şəbəkəsində (keçmiş Twitter) Rusiyanın dezinformasiya kampaniyasını üzə çıxarıb. Nəşr cümə günü, yanvarın 26-da XİN-in daxili hesabatına istinadən yazır ki, bu kampaniyanın məqsədi, görünür, Almaniyanın hazırkı koalisiya hökumətindən cəmiyyətdə narazılığı artırmaq və Ukraynaya gələcək dəstəyi pozmaqdır.

X-də 50 min saxta hesab

Daha sonra qeyd edildiyi kimi, Xarici İşlər Nazirliyi xüsusi proqram vasitəsilə X-dəki mesajları təhlil etmək üçün ekspertlərə göstəriş verib və nəticədə almandilli məzmunu yayan geniş miqyaslı saxta hesablar şəbəkəsi müəyyən edilib.
Dekabrın 20-dən yanvarın 20-dək 50.000-dən çox belə hesabda alman dilində ümumilikdə bir milyondan çox tvit yerləşdirilib və onlar tez-tez federal hökuməti guya Ukraynaya dəstək vermək üçün öz əhalisinə etinasızlıq göstərməkdə ittiham ediblər, “Der Spiegel” gizli hesabata istinadən qeyd edir. Nəşr göstərir ki, söhbət dezinformasiya üzrə “sistemli Rusiya kampaniyası”ndan gedir.