Ərdoğan, zəbt edilmiş gəminin kapitanı ilə danışdı (YENİLƏNİB)

Türkiyənin prezidenti Rəcəb Tayyib Ərdoğan dəniz quldurları tərəfindən zəbt olunmuş MOZART gəmisinin kapitanı Furkan Yaranla telefon danışığı keçirib, yanvarın 24-də dövlət başçısı administrasiyasının mətbuat xidməti məlumat yayıb.

"Gəminin Qabona üç ekipaj üzvü ilə hərəkət etdiyi barədə məlumat alan prezident vəziyyəti diqqətlə izlədiyini və oğurlanmış gəmi heyətinin xilas edilməsi üçün tədbirlər görmək barədə tapşırıq verdiyini söylədi",  deyə mətbuat xidməti qeyd edib.

*   *   *

2021 Yanvar 24 (Bazar) 15:25:59

Gəmi heyətinin azərbaycanlı üzvü qətlə yetirilib

Bakı /24.01.21/Turan: Yanvarın 24-də Azərbaycan Xarici işlər naziri Ceyhun Bayramovla Türkiyə xarici işlər naziri Mövlut Çavuşoğlu arasında telefon danışığı baş tutub. Bu barədə Azərbaycan XİN-in yaydığı məlumatda deyilir.

Məlumata görə, Mevlüt Çavuşoğlu dəniz quldurlarının Türkiyəyə məxsus gəmiyə hücumu nəticəsində gəmi heyətinin azərbaycanlı üzvünün ölümü ilə əlaqədar nazir Ceyhun Bayramova başsağlığı verib. M.Çavuşoğlu gəmi heyətinin axtarış-xilasetmə işlərinə başlanıldığını söyləyib.

Məlumatda deyilir ki, C.Bayramov həmkarına təşəkkür edib və xilasetmə işlərinin tezliklə uğurla nəticələnməsini arzulayıb.

Gəmi heyətinin öldürülən azərbaycanlı üzvünün nəşinin vətənə gətirilməsi üçün əlaqələndirilmiş şəkildə müvafiq tədbirlərin həyata keçiriləcəyi qeyd olunub.

Məlumatda vurğulanır ki, nazirlər dəniz quldurlarının beynəlxalq hüquqa zidd əməllərini qəti şəkildə qınayıblar.

Yanvarın 23-də Nijerya'nın Lagos şəhəri yaxınlığında dəniz quldurları Türkiyəyə məxsus “Mozart” yük gəmisinə hücum ediblər.

Hücum nəticəsində dəniz quldurları 19 nəfərlik gəmi heyətindən 15 nəfəri girov  götürərək gəmini tərk ediblər. Hücum zamanı heyətin azərbaycanlı üzvü qətlə yetrilib.

Gəmi heyəti 3 nəfər olmaqla Gabonun Port-Gentil limanına doru hərəkət  etməkdədir,  Türkiyə  vaxtilə bu gün, yanvarın 24-də  saat 9-da (Azərbaycan vaxtilə saat 10) limana çatması gözlənilir.-0-