Ermənistanda gərginlik stabil olaraq qalır

Yerevan 25.06.15/Turan- Armİnfo: Ermənistan hökuməti elektrik enerjisi tariflərinin artırılması ilə əlaqədar sosial baxımdan təminatsız vətəndaşlara subsidiya verilməsini təklif edir. Bu barədə iyunun 25-də hökumətin iclasında baş nazir Ovik Abramyan bildirib.

Onun sözlərinə görə, hökumət ölkənin bütün vətəndaşlarının subsidiyalaşdırılması imkanlarını istisna edib. Subsidiyalaşma 105 min nəfər təminatsız ailəyə və ya 400 min nəfərə şamil ediləcək. İldə bir ailəyə subsidiya 24 min dram və Ermənistan üzrə illik 2,5 mlrd. dram təşkil edə bilər.

Onun sözlərinə görə, dünyada heç bir hökumət, o cümlədən Ermənistan hökuməti elektrik enerjisi tariflərinin artırılmasını istəməz, lakin hökumət yaranmış reallığı nəzərə almalıdır. “Cəmiyyətdə belə təəssürat yaranıb ki, tariflərin artırılması “Ermənistan Elektrik Şəbəkəsi” QSC-dəki  sui-istifadə halları və ya xalq arasında deyildiyi kimi talanla bağlıdır.

“Biz bu məsələyə məsuliyyətlə yanaşmağa borclu idik, ölkənin təhlükəsizliyinin mühüm tərkib hissəsi olan enerji təhlükəsizliyini təmin etməliyik”, - Abramyan bildirib.

Lakin Abramyanın sözləri mitinqçilərə təsir etməyib. Onlar üçüncü gündür ki, Yevevanın və ölkənin digər dörd şəhərinin küçələrindən dağılışmırlar. Etirazçılar tariflərin 40% artırılması barədə qərarın ləğvini tələb edirlər.

Cümə axşamı Yerevanın küçələrində etiraz aksiyası davam edib, yerli KİV bildirir.-02D-