Ermənistanın ilk prezidenti Türkiyə və Azərbaycanla barışığa çağırıb

Bakı/16.06.21/Turan: Hazırda Azərbaycanla müharibənin yenidən başlaması təhlükəsi yoxdur. Bunu iyunun 15-də Ermənistanın ilk prezidenti Levon Ter-Petrosyan ictimai telekanala müsahibəsində bildirib.

"Hazırda Əliyevdən təhlükə gəlmir. Sülh hökm sürür, Rusiya qoşunları dayanır və Ermənistanla Azərbaycan arasında müharibə mümkün deyil. Razılaşmaya bilərsiniz, amma vaxt keçdikcə biz həm Əliyevlə, həm də Türkiyə ilə hansısa bir razılığa gəlməliyik. Qonşular əbədi düşmən ola bilməzlər", - o qeyd edib.

Onun sözlərinə görə, qonşularla əbədi düşmənçilik Ermənistanın özünün mövcudluğunu təhlükə altına qoyur. Vəziyyətin nizamlanması üçün sülh, mehriban qonşuluq və barışıq lazımdır. Bundan əlavə, birinci prezident əlavə edib ki, bundan sonra Qarabağ münaqişəsinin həlli Ermənistandan asılı deyil. O həll etməyəcək, bəlkə Rusiya, yaxud Birləşmiş Millətlər Təşkilatı həll edəcək. Və barışıqdan başqa bir yol olmayacaq.

"Gözləməyin ki, hansısa erməni deyə bilsin ki, “mən Qarabağ münaqişəsini həll edəcəyəm”. Beləsi yoxdur, mövcud deyil. Bu, illüziyadır", - o deyib.

Ter-Petrosyan bildirib ki, tənqiddən qorxmur və inandığı həqiqəti söyləməyə üstünlük verir. Eks-prezident ziyalılara və elmi dairələrə ünvanladığı müraciətində xalq arasında çaşqınlıq yaradanları ən böyük xəyanətkarlar adlandırıb. -02D-