İranın xarici işlər naziri Davosda: Qəzzada müharibə bitərsə, İsrailə hücumlar dayanacaq

Reuters: İranın xarici işlər naziri çərşənbə günü bildirib ki, Qəzzada müharibə bitərsə, İsrailə hücumlar və “Müqavimət Oxu”nun fəaliyyətləri sona çatacaq və xəbərdarlıq edib münaqişə bütün Yaxın Şərqdə gərginliyi artıra bilər.

İslam Respublikası Qəzzanı havadan və qurudan hücumla viran qoyan İsraillə müharibədə Fələstinin HƏMAS qrupunu dəstəkləyir, Tehran isə ABŞ-ı İsrailin Qəzzada törətdiyi cinayətləri dəstəkləməkdə ittiham edir.

“Qəzzada soyqırımına son qoyulması bölgədə hərbi əməliyyatlara və böhranlara son qoyacaq”, - deyə Davosda keçirilən Dünya İqtisadi Forumunda Əmir Abdullahiyan bildirib.

“Qırmızı dənizin təhlükəsizliyi Qəzza hadisələri ilə bağlıdır və İsrailin Qəzzada cinayətləri dayanmasa, hamı əziyyət çəkəcək... Bütün cəbhələr (müqavimət) aktiv qalacaq”.

ABŞ və Britaniya döyüş təyyarələri, gəmiləri və sualtı qayıqlarının gecə ərzində Yəmənə onlarla hava hücumu həyata keçirməsindən sonra ABŞ prezidenti Co Bayden cümə günü Yəmənin İran tərəfindən dəstəklənən husi qüvvələrini "terrorçu" qruplaşma adlandırıb.

İsrailə qarşı fələstinlilərlə həmrəylik nümayiş etdirərək Qırmızı dənizdə gəmilərə hücum edən Husi milisləri ABŞ və Böyük Britaniyanın zərbələrinə “güclü və təsirli cavab” veriləcəyi ilə hədələyiblər.

Əmir Abdullahiyan həmçinin deyib ki, Tehran İsrailin “Mossad” kəşfiyyat agentliyinin İraqın yarımuxtar kürd bölgəsindəki fəaliyyəti ilə bağlı İraqla kəşfiyyat məlumatlarını paylaşıb.

İran İnqilab Keşikçiləri Qvardiyasının bazar ertəsi Ərbil şəhərində İsrailin İraqdakı "casus qərargahına" hücum etdiyini bildirib. İraq daha sonra ölkədə belə bir casus mərkəzinin olduğunu təkzib etdi.