İstanbul hava limanında terror aktı

İstanbul hava limanına hücumda üç terrorçu-kamikadze iştirak edib. Şahidlərin sözlərinə görə, onlardan biri hava limanı binasının yaxınlığında, digər ikisi isə beynəlxalq terminalda özünü partladıb.

NBC News bildirib ki,    Atatürk hava limanı əməkdaşının sözlərinə görə, o, hava limanında üç terrorçu-kamikadzeni görüb. Digər şahid nəşrə bildirib ki, ilk partlayış səsi dayanacaqda eşidilib. Terrorçulardan biri AK-47 silahından atəş açıb, sonra özünü partladıb. Onun sözlərinə görə, həmin an təhlükəsizlik xidmətinin əməkdaşları dayanacağa qaçıblar.

Həmin vaxt başqa bir terrorçu beynəlxalq reyslərin uçuş zonasında özünü partladıb. Üçüncü isə informasiya lövhəsinə yaxınlaşıb. Polislər onu görərkən “kamikadze” deyə çığırıblar, lakin onu saxlamaq mümkün olmayıb. Bundan sonra daha bir partlayış baş verib. Mənbə NBC News-a bildirib.

Şahidlərdən biri, Cənubi Afrikadan olan turist Pol Ross terrorçunu hava limanında gördüyünü deyib.

O və həyat yoldaşı evə getməyə hazırlaşırmışlar. Bu vaxt partlayış baş verib. “Orada qara geyimli bir gənc dolaşırdı, onun əlində tapança vardı”, - Ross bildirib.

Son məlumatlara görə, iyunun 28-də axşam Atatürk hava limanına hücum zamanı 36 nəfər həlak olub, 147 nəfər xəsarət alıb.

Türkiyənin baş naziri Binəli Yıldırım bildirib ki, hücumda üç terrorçu-kamikadze iştirak edib. Onlar hava limanına taksidə gəliblər. Onların üçü də öncə özləri ilə gətirdikləri silahlardan atəş açıblar, sonra özlərini partladıblar. Baş nazirin sözlərinə görə, Türkiyə hakimiyyəti hücumun arxasında “İslam dövləti” qruplaşması durmasından şübhələnir.—0--