Livan “Hizbullah”ının rəhbəri İsrail və Kipri hədələyir

Reuters: Livan “Hizbullah”ının rəhbəri çərşənbə günü deyib ki, iki rəqib arasında genişmiqyaslı müharibə başlayarsa, İsrailin heç bir yeri təhlükəsiz olmayacaq, həmçinin ilk dəfə olaraq Aİ üzvü olan Kipri və Aralıq dənizinin digər hissələrini hədələyib.

“Hizbullah” Qəzzadakı müharibəyə paralel olaraq səkkiz aydan çoxdur ki, İsraillə atışma həyata keçirir. İranın dəstəklədiyi qruplaşma çərşənbə axşamı İsrail ərazisinin dərinliklərində vacib hərbi obyektlərin pilotsuz uçuş aparatları ilə çəkildiyi deyilən görüntülərini yayımlayıb.

Çərşənbə günü televiziya ilə çıxış edən “Hizbullah” rəhbəri Seyid Həsən Nəsrullah deyib ki, daha böyük müharibə olacağı təqdirdə İsraildə "raketlərimiz və pilotsuz uçuş aparatlarımız təhlükəsiz yer qoymayacaq".

Onun sözlərinə görə, qruplaşmanın “bir sıra hədəfləri” də var idi ki, onlara qarşı dəqiq zərbələr endirə bilər.

İsrail "bilir ki, Aralıq dənizində də onu çox ciddi bir şey gözləyir... Bu böyüklükdə döyüş qarşısında o bilir ki, indi bizi quruda, havada və dənizdə gözləməlidir”, - Nəsrullah əlavə edib.

İsrailin xarici işlər naziri İsrael Kats çərşənbə axşamı “Hizbullah”la genişmiqyaslı müharibə ilə bağlı qərarın tezliklə veriləcəyi barədə xəbərdarlıq edib, İsrail hərbçiləri isə "Livanda hücum üçün əməliyyat planlarının təsdiqləndiyini" bildirib.

Nəsrullah həmçinin Livana yaxın olan və onunla isti münasibətləri olan Aİ üzvü Kipri ​​İsrailə öz hava limanlarından və bazalarından hərbi təlimlər keçirmək üçün istifadə etmək icazəsi verməkdə günahlandıraraq hədələyib.

"Kipr hökumətinə xəbərdarlıq edilməlidir ki, Livanı hədəf alan düşmən İsrailə Kipr hava limanları və bazalarının açılması Kipr hökumətinin müharibənin bir hissəsinə çevrilməsi və müqavimətin (“Hizbullah”) onunla müharibənin bir hissəsi kimi mübarizə aparacağı anlamına gəlir" deyə Nəsrullah bildirib.

Kipr tərəf tutduğunu inkar edir

Kipr prezidenti Nikos Xristodulidis Kiprin hər hansı münaqişədə tərəf tutması ilə bağlı iddiaları rədd edib.

“Bu (Kipr) problemin bir hissəsi deyil, həllin bir hissəsidir. Bu rol, məsələn, təkcə ərəb dünyası deyil, həm də beynəlxalq ictimaiyyət tərəfindən tanınan humanitar (yardım) dəhliz sayəsində göz qabağındadır”, - deyə o, Kiprdən Qəzzaya yardım göndərilməsinə toxunaraq bildirib.

Məlumdur ki, Kipr İsrail ordusuna hər hansı quru və ya baza verməyib, keçmişdə İsrailə geniş hava məkanından - uçuş məlumatı bölgəsindən hava təlimləri üçün istifadə etməyə icazə verib, lakin münaqişə zamanı heç vaxt bunu etməyib.

Kiprdəki suveren Britaniya hərbi bazaları Böyük Britaniya tərəfindən keçmişdə Suriyada, daha yaxınlarda isə Yəməndə əməliyyatlar üçün istifadə edilib.

Kipr hökumətinin bu məsələdə heç bir səs hüququ yoxdur. 1960-cı ilə qədər müstəmləkə olan Kiprdə iki Britaniya bazası var. Nəsrullah deyib ki, onun qruplaşması daha böyük müharibə olacağı təqdirdə “qaydasız” və “məhdudiyyətsiz” döyüşəcək.

O, keçən həftə İsrailin hücumu zamanı öldürülən komandirin - İsraillə hazırkı münaqişədə öldürülən “Hizbullah”ın ən yüksək səviyyəli xadiminin xatirəsinə həsr olunmuş tədbirdə çıxış edib.

“Hizbullah” buna cavab olaraq İsrailə pilotsuz uçuş aparatları və raketlərlə iri miqyaslı hücum həyata keçirdi.

BMT rəsmiləri münaqişənin gərginləşməsindən narahat olduqlarını bildiriblər və ABŞ səfiri Amos Hohştein hər iki tərəfi genişmiqyaslı münaqişəyə girməməyə çağırmaq üçün İsrail və Livana səfər edib.

“Hizbullah” dənizdə gəmiyə hücum edə biləcəyini ilk dəfə 2006-cı il müharibəsi zamanı Aralıq dənizində İsrail hərbi gəmisini vurarkən nümayiş etdirib.

Mətbuatın və analitiklərin məlumatlarında illərdir qeyd olunurdi ki, “Hizbullah” on il əvvəl Suriyada prezident Bəşər Əsədə ölkədəki vətəndaş müharibəsi ilə mübarizədə kömək etmək üçün qüvvəllərini orda yerləşdirdikdən sonra bu ölkədən Rusiya istehsalı olan “Yaxont” gəmi əleyhinə raketlərini alıb.