Livandan atılan raket hücumlarından sonra İsrailin şimalında meşə yanğınları başlayıb

AFP: Çərşənbə axşamı İsrail hakimiyyəti ölkənin şimalında qonşu Livandan raket və pilotsuz təyyarələrin hücumları nəticəsində bir şəhərin qismən boşaldılmasına səbəb olan güclü meşə yanğınları ilə mübarizə aparıb.

“Yanğınsöndürmə bölmələri müxtəlif təşkilatların köməyi ilə yanğınların söndürülməsi üçün çalışırlar”, - deyə İsrail polisi məlumat verib və Kiryat Şmonadakı bir neçə evin təxliyə edildiyini bildirib.

Şimal-şərq şəhərində işləyən AFP fotoqrafı Qəzza müharibəsində İsrail ordusu ilə İranın dəstəklədiyi “Hizbullah” silahlı qruplaşması arasında, demək olar ki, hər gün silahlı döyüşlərin getdiyi Livanla sərhəd bölgəsinin bəzi hissələrini güclü yanğınların bürüdüyünü görüb.

İsrail ordusu yanğınsöndürənlərə dəstək vermək üçün əlavə qüvvələr göndərdiyini bildirib.

"İD-nin altı ehtiyatda olan əsgəri tüstüdən zəhərlənərək yüngül xəsarətlər alıb və tibbi yardım üçün xəstəxanaya aparılıb", - ordudan bildiriblər.

"Təhlükəsizlik qüvvələri yanğın baş verən ərazilərə nəzarəti bərqərar edib və indiki mərhələdə insanların həyatı üçün təhlükə yoxdur", - məlumatda deyilir.

Quru qoşunlarının Şimal Komandanlığının rəhbərləri bir gecədə Kiryat Şmonaya gəliblər və ordu sektorda “vəziyyəti qiymətləndirir”.

İsrailin baş naziri Benyamin Netanyahunun ofisi ordu ilə birlikdə Livandan atılan raket hücumları və pilotsuz təyyarələrin hücumlarından sonra bazar ertəsi başlayan yanğınları yaxından izlədiyini bildirib.

Buna cavab olaraq İsrail ordusu Livanın cənubundakı “Hizbullah” hədəflərinə hava zərbələri endirib.