Moskva və Kiyev Belarus danışıqlarında təmas nöqtəsini tapıblar

Bakı/28.02.22/Turan: Rusiya və Ukraynanın insan hüquqları üzrə müvəkkilləri itkin düşmüş şəxslərin məsələsilə bağlı qarşılıqlı fəaliyyət göstərəcək və tutulanların saxlanma şəraitini yoxlayacaqlar. Bu barədə RBK-ya rusiyalı ombudsman Tatyana Moskalkovanın mətbuat xidməti bildirib.

"Ukrayna Ali Radasının insan hüquqları üzrə müvəkkili Lyudmila Denisova ilə itkin düşmüş şəxslərin yerinin müəyyən edilməsi və tutulanların saxlanma şəraitinin yoxlanılması baxımından humanitar istiqamətdə qarşılıqlı yardım üzrə fəaliyyətə dair razılığa gəldik. Biz işləyirik”, - mətbuat xidməti Moskalkovanın sözlərini çatdırıb.

Moskalkova humanitar istiqamətdə ombudsmanların əməkdaşlığı barədə Belarusun Qomel vilayətində Rusiya və Ukrayna nümayəndə heyətləri arasında keçirilən danışıqlardan sonra bildirib.

Danışıqlar beş saata yaxın davam edib, bütün gündəliyi ətraflı müzakirə etmək mümkün olub, Rusiya nümayəndə heyətinin rəhbəri, prezidentin köməkçisi Vladimir Medinski bildirib. Onun sözlərinə görə, tərəflər “ümumi mövqelərin proqnozlaşdırılması üzrə” bəzi nöqtələri tapıblar.

UNİAN qeyd edir ki, Ukrayna və Rusiya Federasiyası nümayəndə heyətləri arasında danışıqların ikinci raundu yaxın vaxtlarda baş tutmalıdır. Bu barədə Ukrayna prezidentinin ofisinin Facebook sosial şəbəkəsindəki məlumatında deyilir.
"Ukrayna-Belarus sərhədi ərazisində görüşən Ukrayna və Rusiya nümayəndə heyətləri tezliklə atəşkəsə nail olunması və hərbi əməliyyatların dayandırılması üçün təmas nöqtəsinin tapılması məqsədilə danışıqların ilk raundunu keçiriblər", -  məlumatda bildirilir.

"Tərəflər qarşılıqlı məqbul qərarların tapılması perspektivlərinə malik bir sıra əsas mövzuları ətraflı müzakirə ediblər", - məlumatda qeyd olunur.

“Dövlətlərin paytaxtlarında dərhal əlavə məsləhətləşmələrə çıxmaq qərara alınıb. Bundan sonra yaxın vaxtlarda Ukrayna və Rusiya tərəfləri arasında danışıqların ikinci raundu keçiriləcək", - məlumatda deyilir.—0--