Putin BCM-in üzvü olan Monqolustana gəlib

AP:  Rusiya prezidenti Vladimir Putin bazar ertəsi onun həbsinə order verən beynəlxalq məhkəmənin üzvü olan Monqolustana gəlib.

Çərşənbə axşamı onun Monqolustan lideri Uxnaa Xurelsuxla görüşəcəyi rəsmi səfər təxminən 18 ay əvvəl Ukraynada hərbi cinayətlərdə ittiham olunaraq həbsinə order verilməsindən sonra Putinin Beynəlxalq Cinayət Məhkəməsinin üzvü olan ölkəyə etdiyi ilk səfərdir.

Ukrayna Monqolustanı Putini həbs edib Haaqa məhkəməsinə təhvil verməyə çağırıb. Putinin sözçüsü ötən həftə Kremlin səfərdən narahat olmadığını bildirib.

Beynəlxalq məhkəmənin üzvlərindən həbs qərarı çıxarıldığı halda şübhəliləri həbs etmək tələb olunur, lakin məhkəmənin icbari icra mexanizmi yoxdur.

Rusiya və Çin arasında yerləşən, seyrək məskunlaşan Monqolustan yanacaq və elektrik enerjisi təchizatında birincidən, mədənçilik sərmayəsi üçün isə ikincisindən çox asılıdır.

Beynəlxalq Cinayət Məhkəməsi (BCM) Putini 2 il yarımdır döyüşlərin getdiyi Ukraynadan uşaqların oğurlanmasında əli olmaqda ittiham edib.

Putin və Monqolustan lideri çərşənbə axşamı 1939-cu ildə sovet və monqol qüvvələrinin Çinin şimal-şərqində Mançuriyaya nəzarəti ələ keçirən Yaponiya ordusu üzərində qələbəsini anma mərasimində iştirak edəcəklər. Mançuriya və Monqolustan sərhədi ilə bağlı mübahisəyə görə aylardır davam edən döyüşlərdə minlərlə əsgər həlak olub.

Putin Ukraynanın işğalı ilə bağlı beynəlxalq təcridlə üzləşsə də, iyun ayında Şimali Koreya və Vyetnama səfər edib, son bir ildə isə iki dəfə Çinə səfər edib.

Keçən il o, Cənubi Afrika hökuməti onun Çin və digər inkişaf etməkdə olan iqtisadiyyatların da daxil olduğu BRİKS sammitində iştirakına qarşı çıxdıqdan sonra video bağlantı vasitəsilə Yohannesburqda keçirilən görüşə qatıldı. Cənubi Afrika da BCM-in üzvüdür.