Rusiyalı deputat deyir ki, Bayden raket qərarı ilə III Dünya müharibəsi riski yaradıb

Reuters: MOSKVA (“Reuters”) - Rusiyalı deputat Mariya Butina bazar ertəsi bildirib ki, prezident Co Baydenin administrasiyası Ukraynaya Rusiya ərazisinin daha  dərinliklərinə zərbələr endirmək üçün ABŞ istehsalı silahlardan istifadə etməyə icazə verərsə, III Dünya müharibəsi riski yaradacaq.

"Bu uşaqlar, Bayden administrasiyası vəzifədə olduqları müddətdə vəziyyəti mümkün qədər gərginləşdirməyə çalışırlar", - deyə Butina “Reuters”ə bildirib.

“Ümid edirəm ki, bu qərar qəbul edilərsə, (Donald) Tramp onu ləğv edəcək, çünki qərar III Dünya müharibəsi riski yaradır, bu isə heç kimin maraqlarına uyğun deyil”.

“Reuters” agentliyi iki ABŞ rəsmisinə və qərarla tanış olan mənbəyə istinadən bazar günü bildirib ki, Bayden administrasiyası Ukraynaya Rusiya ərazisinin dərinliklərinə silah zərbələri endirməsinə icazə vermək qərarına gəlib.

“New York Times” da Bayden administrasiyasının bu qərarı verdiyini yazıb. Kreml hələlik bu xəbərlərə münasibət bildirməyib.

Prezident Vladimir Putin sentyabrın 12-də bildirib ki, Qərbin belə bir addımı təsdiqləməsi “NATO ölkələri, ABŞ və Avropa ölkələrinin Ukraynadakı müharibəyə birbaşa cəlb edilməsi” deməkdir, çünki raketlərin hədəfə alınması və buraxılmasına NATO-nun hərbi infrastrukturu və şəxsi heyəti cəlb olunacaq.

Oktyabrın sonunda Putin demişdi ki, ABŞ və onun NATO müttəfiqləri Ukraynaya uzaqmənzilli Qərb raketləri ilə Rusiya ərazisinə dərin zərbələr endirməyə kömək edərsə, Rusiya Müdafiə Nazirliyi bunlara cavab verməyin müxtəlif yollarını araşdırır.

"Düşünürəm ki, Birləşmiş Ştatlarda itirəcək heç nəyi olmayan və ya reallıqdan çox uzaq olan insanlar var ki, onların vecinə deyil", deyə qeydiyyatdan keçməmiş rus agenti qismində 15 ayını ABŞ həbsxanasında keçirən və və hazırda hakim “Vahid Rusiya” partiyasından deputat olan Butina bildirib.