Türkiyə hər iki ölkədə baş verən zorakılıqlardan sonra Suriya ilə sərhədi bağlayıb

Reuters:  Suriya müxalifətindəki mənbə və yerli sakinlər bildiriblər ki, Türkiyə əsgərlərinin Türkiyədəki həmvətənlərinə qarşı zorakılıqdan qəzəblənən suriyalıların atəşinə məruz qalmasından sonra Türkiyə çərşənbə axşamı Suriyanın şimal-qərbindəki əsas sərhəd keçidlərini bağlayıb.

Türkiyənin daxili işlər naziri Əli Yerlikaya bildirib ki, bazar günü axşam saatlarında başlayan iğtişaşların yayılması ilə əlaqədar Türkiyə polisi bir gecədə Suriya icmasına hücumlarla əlaqəsi olan 474 nəfəri saxlayıb.

Sosial şəbəkələrdə Suriyalı bir kişinin gənc qız qohumuna cinsi təcavüz etməsi ilə bağlı yayılan xəbərlərdən sonra Kayseri şəhər mərkəzində suriyalılara məxsus mülklər və avtomobillər yandırılıb. Yerlikaya hadisənin araşdırıldığını bildirib.

Türkiyə Kəşfiyyat Təşkilatı MİT-in açıqlamasında bildirilir ki, zorakılıq Hatay, Qaziantep, Konya, Bursa şəhərlərində və İstanbulun bir rayonunda yayılıb.

Sosial şəbəkələrdə bir neçə suriyalının yaralanması ilə bağlı xəbərlər yayılıb.

Daha sonra yüzlərlə qəzəbli suriyalı üsyançıların nəzarətində olan Suriyanın şimal-qərbində, Türkiyənin minlərlə əsgəri saxladığı və Suriya prezidenti Bəşər Əsədin nəzarəti bərpa etməsinə mane olan təsir dairəsi yaratmış bir neçə şəhərdə küçələrə çıxıb.

Bazar ertəsi gec saatlarda Türkiyə iğtişaşlara cavab olaraq 3 milyondan çox sakinin əsas ticarət və sərnişin keçidi olan Bab əl-Həva sərhəd-keçid məntəqəsini, həmçinin Bab əl-Salam və digər kiçik keçidləri növbəti xəbərdarlığa qədər bağlayıb, bu barədə “Reuters”ə Sərhəd Xidmətinin nümayəndəsi bildirib.

Suriya ilə sərhəddə yerləşən Afrin şəhəri silahlı etirazçılarla türk hərbçiləri arasında atışma nəticəsində azı 4 nəfərin həlak olduğu ən şiddətli döyüşlərə səhnə olub.

Başqa yerlərdə atışma və silahlı toqquşmalar baş verib, bir neçə şəhərdə mülki vətəndaşlar türk avtomobil kolonlarına daş atıb, bəzi ofislərdən Türkiyə bayrağını qopardaraq yerə atıblar.

Bir neçə türk rəsmisi Suriyadakı iğtişaşları “təxribat” adlandırıb, Xarici İşlər Nazirliyi isə bildirib:

“Kayseridə baş verən kədərli hadisələri... sərhədlərimiz xaricində bəzi təxribatlar üçün əsas kimi istifadə etmək yanlışdır”.

Çərşənbə axşamı çıxışında Türkiyə prezidenti Tayyip Erdoğan terror təşkilatları ilə əlaqəli qrupları "xaos planı"nda günahlandırdı və son hadisələrin arxasındakı "o çirkli əlləri" ifşa edəcəyinə söz verdi.

“Terror təşkilatının qalıqlarının təşkil etdiyi bu oyunları kimin oynadığını bilirik. Nə biz, nə də suriyalı qardaşlarımız bu hiyləgər tələyə düşməyəcəyik... Biz irqçi vandalizmə boyun əyməyəcəyik”, - deyə Ərdoğan Nazirlər Kabinetinin iclasından sonra bildirib.

Ərdoğan 670 mindən çox insanın Suriyanın şimalında Türkiyənin son on ildə təhlükəsiz bölgə əməliyyatları keçirdiyi bölgələrə qayıtdığını bildirib. O əlavə edib ki, qaçqın problemi 3 milyondan çox suriyalı müharibə qaçqına ev sahibliyi edən Türkiyənin iqtisadi reallıqlarına uyğun olaraq insani və mənəvi cəhətlərə uyğun həll olunacaq.

Ərdoğan ötən cümə günü bildirib ki, Əsədlə görüş ikitərəfli münasibətlərin bərpasına kömək edə bilər.

Türkiyə 2011-ci ildə Suriya vətəndaş müharibəsindən sonra Suriya ilə əlaqələri kəsib və Əsədi devirmək istəyən üsyançılara dəstək verib.