Türkiyədə yüzlərlə PKK döyüşçüsü və İD fəalı saxlanılıb

İyulun 24-də səhər saatlarında Türkiyənin 13 əyalətində hüquq-mühafizə orqanlarının genişmiqyaslı əməliyyatı başayıb. Təkcə İstanbulda bu əməliyyatda 5000-ə yaxın polis əməkdaşı və xüsusi təyinatlılar iştirak edir. Ölkənin ən böyük şəhərində Kürdüstan İşçi Partiyasının (PKK) gənclər təşkilatının üzvləri və solçu radikal təşkilatların üzvləri saxlanılıb, xəbəri BBC yayıb.

Kürd və islamçı fəalların həbsi Ankarada, İzmirdə, habelə Suriya ilə sərhəd rayonlarda da həyata keçirilib. İlkin məlumatlara görə, ümumilikdə 251 nəfər saxlanılıb.

Eyni zamanda, Türkiyə ilk dəfə olaraq Suriyada “İslam Dövləti”nin döyüşçülərinə qarşı hərbi əməliyyatda iştirak edib.

Türkiyə HHQ-nin F16 təyyarələri qonşu ölkənin ərazisində üç hədəfə hücum edib. Bu zaman islamçıların iki bazası və bir qərargahı məhv edilib, onların itkisi 35 nəfər təşkil edib.

Türkiyənin Müdafiə Nazirliyi qeyd edir ki, təyyarələr raket buraxmaqla Suriyanın hava məkanını pozmayıb.

BBC-nin Vaşinqtondakı mənbələri bildiriblər ki, ABŞ prezidenti Barak Obama Türkiyə prezidenti Recep Tayyip Erdoğanla “İslam Dövləti” döyüşçülərinə qarşı birgə əməliyyatlar həyata keçirilməsi haqqında razılıq əldə edib. Söhbət xüsusən amerikalıların Türkiyənin şərqində İncirlik bazasından istifadə etməsindən gedir.

Türkiyənin xarici siyasət mövqeyinin dəyişməsinin səbəblərindən biri iyulun 20-də Süruç şəhərində baş vermiş partlayış ola bilərdi. Suriyadan qayıtmış 20 yaşlı “canlı bombanın” həyata keçirdiyi terror aktı nəticəsində 32 nəfər həlak olub. Türkiyə hakimiyyəti bildirib ki, hücumun arxasında “İslam Dövləti” dura bilər. -02D-