Ukrayna "Lukoyl"un tranzitinə icazə verənə qədər Macarıstan Aİ-nin üzv ölkələrə vəsait ayrılmasına mane olacaq

Reuters:  Macarıstanın xarici işlər naziri çərşənbə axşamı bildirib ki, Macarıstan, Kiyev Rusiyanın "Lukoyl" şirkətinin neftinin öz ərazisindən boru kəməri ilə tranzitinə icazə verənə qədər, Ukraynaya sursat verən üzv ölkələrə Aİ ödənişlərini bloklayacaq.

Bu ayın əvvəlində Slovakiya və Macarıstan Ukraynanın ötən ay “Lukoil”in resurslarının tranzitinə qadağa qoymasından sonra "Drujba" kəməri ilə "Lukoyl"dan neft almağı dayandırdıqlarını bildiriblər.

Həmçinin çərşənbə axşamı yaranmış vəziyyətə cavab olaraq, Macarıstanın Energetika Nazirliyi təchizat təhlükəsizliyi üzrə işçi qrupunu çağırıb, bu qrup “indiyə qədər atılan addımları və mümkün növbəti addımları nəzərdən keçirib”, deyə nazirliyin açıqlamasında bildirilir.

“Bu məsələ Ukrayna tərəfindən həll olunana qədər, hər kəs Avropa Sülh Fondu (EPF) tərəfindən silah tədarükünə görə 6,5 milyard avro məbləğində təzminat ödəməsini unutmalıdır”,  ATV kanalı xarici işlər naziri Peter Siyartodan sitat gətirib.

Ukrayna Xarici İşlər Nazirliyi şərh sorğusuna dərhal cavab verməyib.

Kiyev deyir ki, "Lukoyl"a neft tədarükünü kəsib, lakin digər təchizatçılara da xidmət edən boru kəməri ilə neftin ümumi axını azalmayıb.

Rusiyanı Şərqi Avropadakı keçmiş sosialist bloku ölkələri ilə birləşdirən “Drujba” neft kəməri Aİ-nin Rusiyadan enerji təchizatının əksər mənbələrindən imtina etməsinə baxmayaraq, iki ildən artıq davam edən müharibə vaxtı işləməyə davam edib.

Macarıstan Rusiya neftindən çox asılı olaraq qalır və bu olmadan neft emalı zavodlarını təmin edə bilməyəcəyini bildirir.

Bazar ertəsi Macarıstan və Slovakiya Avropa Komissiyasından Ukrayna ilə məsləhətləşmə prosedurunda vasitəçilik etməyi xahiş ediblər.

Bu prosedur Aİ icra hakimiyyətinin üç gün ərzində qərar vermədiyi təqdirdə məsələnin məhkəməyə verilməsinə imkan verəcək.

2021-ci ildə yaradılmış EPF, Aİ üzvlərinə digər ölkələrə döyüş sursatı göndərmək üçün pulu geri almağa imkan verən keşbek sistemi kimi fəaliyyət göstərir.

2022-ci ildə Rusiyanın Ukraynaya təcavüzündən sonra Ukraynaya silah verən üzv dövlətlər bu fonddan təzminat tələb edə bilər.

Lakin Macarıstan bir ildən artıqdır ki, müxtəlif problemləri əsas gətirərək EPF pulunun növbəti tranşının ödənilməsinə mane olur.