Ukrayna prezidenti Zelenski müttəfiqlərini Rusiyanın kölgə donanmasını dayandırmağa çağırıb

Reuters: Ukrayna prezidenti Vladimir Zelenski çərşənbə axşamı müttəfiqlərindən Rusiyanın sanksiyalardan yayınmaq üçün istifadə etdiyi “kölgə donanması” adlandırılan gəmilərin artıq Avropa sularında fəaliyyət göstərməməsini təmin etməyi xahiş edib.

Zelenski X-də yazıb ki, donanma “təkcə sanksiyalarla deyil, həm də digər vasitələrlə” məhdudlaşdırılmalıdır.

“Bu donanma ən böyük təhlükələrdən biridir. Putin bu tankerlərdən öz müharibəsini maliyyələşdirmək üçün istifadə edir və bu gəmilərin əksəriyyəti köhnədir, bərbad vəziyyətdədir və heç bir nəzarət olmadan işləyir”, - deyə Ukrayna lideri bildirib.

Bazar ertəsi Avropa İttifaqı Moskvanın kölgə donanmasının neft, silah və taxıl daşınması ilə bağlı Qərbin məhdudiyyətlərindən yan keçməyə çalışan daha 52 gəmisinə qarşı sanksiyalar tətbiq edib. Bununla da siyahıda olan gəmilərin ümumi sayı 79-a çatıb.

Çərşənbə axşamı İngiltərə də Rusiya neftinə qarşı sanksiyalardan qaçmaq üçün qeyri-qanuni üsullardan istifadə etdiyini bildirdiyi 20 gəmiyə sanksiya tətbiq edib.

Zelenski Krım yarımadası yaxınlığında Kerç boğazında Rusiya tankerinin batması nəticəsində bazar günü neft sızmasını “ekoloji fəlakət” adlandırıb.

Bir tanker fırtına zamanı parçalanıb, digəri isə qəza vəziyyətində olub.  Rusiyanın TASS dövlət xəbər agentliyinin məlumatına görə, gəmilərdə ümumilikdə 9200 ton neft məhsulları olub.

 Ukrayna Hərbi Dəniz Qüvvələrinin sözçüsü bildirib ki, Rusiya güclü fırtına zamanı köhnə tankerlərdən istifadə etməklə və iki gəmini dənizdə saxlamaqla gəmiçilik təhlükəsizliyini pozub.

“Dənizlərinizdə daha böyük və daha təhlükəli Rusiya tankerləri işləyir. Bu donanma dayandırılmalıdır. Bu, təkcə Rusiyanın müharibəni maliyyələşdirməsini dayandırmayacaq, həm də təbiəti qoruyacaq”, - deyə Zelenski əlavə edib.