Xarici diplomatlar Rusiyada konsert salonuna hücum zamanı həlak olanların xatirəsinə gül dəstələri qoyublar

Reuters:  Rusiya Xarici İşlər Nazirliyinin protokol departamentindən verilən məlumata görə, şənbə günü bir sıra xarici ölkələrin səfirləri Moskva yaxınlığındakı konsert salonuna onlarla insanın ölümünə səbəb olan hücumun qurbanlarının xatirəsinə həsr olunmuş mərasimdə iştirak ediblər.

Martın 22-də silahlı şəxslər Rusiyada son 20 ilin ən dəhşətli hücumunda konsert tamaşaçılarına avtomat silahlardan atəş açıb, azı 144 nəfər həlak olub.

"30 mart 2024-cü il tarixində “Crocus City Hall” kompleksinin yaxınlığındakı memorialda gülqoyma mərasimi keçirilib. Anım tədbirində 130-dan çox diplomatik missiyanın rəhbəri və əməkdaşları (250 nəfərdən çox) iştirak ediblər". Xarici İşlər Nazirliyinin Dövlət Protokolu Departamentinin saytında bildirilir.

“Kommersant” qəzetinin məlumatına görə, mərasimdə ABŞ, Avropa İttifaqı, Afrika, Latın Amerikası ölkələrinin səfirləri, həmçinin BMT və digər təşkilatların nümayəndələri iştirak ediblər.

Onlar və digər ziyarətçilər abidənin önünə gül dəstələri qoyub, səmaya ağ şarlar buraxıblar.

“Biz belə çətin anlarda Rusiya xalqı ilə həmrəy olduqlarına görə diplomatik korpusun hörmətli nümayəndələrinə dərin minnətdarlığımızı bildiririk”, - deyə protokol şöbəsindən bildirilib.

Hücuma görə məsuliyyəti “İslam Dövləti” öz üzərinə götürüb və ABŞ rəsmiləri bunun “İslam Dövləti Xorasan” (İŞİD-K) şəbəkəsinin Əfqanıstan qolu tərəfindən həyata keçirildiyini göstərən kəşfiyyat məlumatlarına malik olduqlarını bildiriblər.

Rusiya müstəntiqləri cümə axşamı konsert zalındakı yaraqlıların "Ukrayna millətçiləri" ilə əlaqəsi olduğuna dair sübutlar tapdıqlarını bildiriblər, bunu ABŞ əsassız təbliğat kimi rədd edir.

Rusiya əvvəldən bildirib ki, Ukraynanın hücumda əli olduğuna inanır, amma Kiyev bunu təkzib edir.