Zelenski deyir ki, Qərb uzaq məsafədən hücumlara icazə verməli və onları həyata keçirmək üçün silahla təmin etməlidir

Reuters:  Prezident Volodimir Zelenski bazar ertəsi bildirib ki, Ukraynanın Qərb müttəfiqləri təkcə öz silahlarının Rusiyanın dərinliklərinə zərbə endirmək üçün istifadə edilməsinə icazə verməməli, həm də Kiyevi daha çox silahla təmin etməlidirlər.

Ukrayna uzun müddətdir ki, öz tərəfdaşlarını düşmən ərazilərindəki hədəfləri vurmaq üçün Qərb silahlarından istifadə etməyə icazə verməyə çağırıb və Rusiyanın Ukraynanın enerji obyektlərinə, digər infrastruktur və yaşayış binalarına qarşı hava hücumları intensivləşdikcə bu çağırışlar daha da güclənib.

Bazar ertəsi Ukraynanın cənub-şərqindəki Zaporojye şəhərində Hollandiyanın Baş naziri Dik Shofla görüşəndən sonra Zelenski Kiyevin belə bir icazənin perspektivləri ilə bağlı “daha ​pozitiv” olduğunu deyib.

"Bu gün sadəcə buna icazə vermək kifayət deyil, müttəfiqlər bu cür hücumlar üçün bizi silahla təmin etməlidirlər. İstifadə etmək istədiyimiz hər şeyi almamışıq", - deyə Zelenski bildirib.

O, əlavə edib ki, bəzi tədarük müqavilələri yerinə yetirilməyib.

O, Shofla Ukraynanın hava hücumundan müdafiəsini gücləndirməyi müzakirə etdiyini bildirib. Zelenski qeyd edib ki, müttəfiqlər tərəfindən təmin edilən F-16 qırıcılarının donanmasının necə artırılması ilə bağlı “bəzi fikirlər” var.

“Biz hava hücumundan müdafiə vasitələri və F-16 döyüş təyyarələri ilə təmin etməyə, eləcə də sursat alışı üçün maliyyələşdirməyə davam edəcəyik”, - Shof deyib.

Shof əlavə edib ki, Hollandiya Ukraynaya enerji infrastrukturunun təmiri və humanitar yardım üçün təxminən 200 milyon avro (221,4 milyon dollar) yardım edəcək.

Hollandiya Xarici İşlər Nazirliyinin bəyanatında deyilir ki, Hollandiya ümumi dəyəri 29,5 milyon avro olan yenilənmiş qaz turbinləri tədarük edəcək və enerji infrastrukturunun təmiri üçün 45 milyon avro ayırıb.

Pul Hollandiya hökumətinin bu ilin əvvəlində Ukraynaya ayırdığı 400 milyon avroluq yardım fondundan götürülür.

Zelenski cəbhə xəttindəki vəziyyəti də şərh edərək bildirib ki, Ukraynanın Rusiyanın qərbindəki Kursk bölgəsinə transsərhəd müdaxiləsi “plana uyğun” gedir.

O əlavə edib ki, Ukrayna bu əməliyyatın Rusiyanın hücumlarını sürətləndirdiyi şərq Ukraynada Pokrovski istiqamətyində təzyiqi azaltmağa kömək edə biləcəyinə inanır.

Onun sözlərinə görə, hələlik orada vəziyyət ağır olaraq qalır.