2013-cü ildə təcili pul köçürmələri üzrə daxilolmalar 1,4 mlrd. manata çatıb

2013-cü ildə Azərbaycanın bank sistemində təcili pul köçürmələri dövriyyəsi 2152,1 mln. manat təşkil edib.

2012-ci ilin göstəriciləri ilə müqayisədə bu, 363,7 mln. manat və ya 20,3% çoxdur. Daxilolmaların payına 80% və ya 1,37 mlrd. manat düşüb.

Dekabr ayında köçürmələrin dövriyyəsi ötən ilin dekabr ayı ilə müqayisədə 27% artaraq, 221,5 mln. manat təşkil edib.

Azərbaycan Mərkəzi Bankının məlumatlarına görə, ötən il qeydiyyatdan keçmiş pul köçürmələrinin ümumi sayı 3512, o cümlədən alınan köçürmələr 2526,1 min olub.

Bu gün Azərbaycanın müxtəlif banklarında 20-yə yaxın beynəlxalq təcili pul köçürmələri sistemi fəaliyyət göstərir. Ənənəvi olaraq Azərbaycanda daxilolmaların həcmi göndəriş həcmindən çoxdur. Əsasən köçürmələr MDB ölkələrində, xüsusən Rusiya və Ukraynada işləyən vətəndaşlarımız tərəfindən həyata keçirilir. Dekabrda göndərilən orta məbləğ 794,5 manat, qəbul edilən orta məbləğ isə 647,2 manat təşkil edib. MDB ölkələrinə köçürmələr üzrə tariflər köçürmə məbləğindən asılı olaraq, 1,5-6 faiz təşkil edir. Ən aşağı komissiyaları Leader (1,3%), Contact (1,5%) və Zolotaya Korona (1,5) təklif edir. Ən yüksək tarif WesternUnion-dadır, belə ki, şirkətin tarif cədvəlinə əsasən, 100 ABŞ dollarının köçürülməsi üçün komissiya 6% təşkil edir, uzaq xarici ölkələrə bu göstərici ümumiyyətlə 15 faizə bərabərdir. -15B-