63 ton Belarus kartofu məhv edilib

Bakı/29.03.23/Turan: Belarusdan gətirilən ərzaqlıq kartofun üç partiyası məişət tullantıları poliqonunda məhv edilib. 

Bu barədə Azərbaycan Respublikasının Qida Təhlükəsizliyi Agentliyi məlumat verir.

Nəzarət tədbirləri çərçivəsində qurumun əməkdaşları tərəfindən Belarus Respublikasından “Famura RS” MMC-nin idxal etdiyi 21 ton, “Turas MM” MMC-nin idxal etdiyi 42,388 ton ərzaqlıq kartof aşkar edilib. nümunələr götürülərək təhlükəsizlik göstəricilərinin müəyyən edilməsi məqsədilə Azərbaycan Qida Təhlükəsizliyi İnstitutunun müvafiq laboratoriyasına təqdim edilib. Kartof nümunələri təhlükəsizlik göstəricilərinin müəyyən edilməsi məqsədilə Azərbaycan Qida Təhlükəsizliyi İnstitutunun müvafiq laboratoriyasına təqdim edilib. 

"Müayinələr nəticəsində hər 3 partiya məhsulda karantin tətbiq edilən zərərvericilər − kartof yumrularında halqavarı çürümə (Clavibacter michiganensis subsp. sepedonicus) və kartof gövdə nematodu (Ditylenchus destructor Thor.) aşkar edilib". Faktla bağlı qanunvericiliyə uyğun olaraq müvafiq tədbirlər görülüb, deyə  Qida Təhlükəsizliyi Agentliyinin məlumatında bildirilir. 

Dövlət Gömrük Komitəsinin məlumatına görə, bu ilin yanvar ayında Belarusda bəyan edilmiş ümumi dəyəri 1,5 milyon dollar olan 4827,3 ton kartof alınıb.

Maraqlıdır ki, yuxarıda qeyd olunan iki şirkət (Famura RS MMC və Turas MM MMC) eyni gündə (1 dekabr 2022-ci il) Bakıda minimum kapitalla (2 manat) yaradılıb.

Dövlət Vergi Xidmətinin məlumatına görə, “Turas MM” MMC-nin (VÖEN: 1308070461) ( https://vergiler.az/news_print.php?announcement_id=64316) 134 681 manat (79,2 min dollar) borcu var. 08B