AccessBank jurnalistlərə 2,4 min verəcək

"AccessBank" QSC jurnalistlər arasında «Azərbaycan iqtisadiyyatının inkişafında mikromaliyyələşdirmənin rolu» mövzusunda müsabiqə elan edib. 

Bankdan verilən məlumata görə, müsabiqəyə avqust ayının 18-dən sentyabr ayının 13-dək tarixlərində qəzet və jurnallarda dərc olunan məqalələr, xəbər süjetləri, televiziya və radioproqramları, İnternet portallarda yerləşdirilmiş Azərbaycan və ya rus dilində materiallar qəbul olunacaq. Materialların son qəbul günü 15 sentyabr 2012-ci ildir.

Yazınlar Times New Roman şriftində - 12, telesüjetlər isə DVD-də təqdim olunmalıdır. Mətnlər A4 formatda 1 səhifədən çox (5-10 min işarə), telesüjetlər isə 3 dəqiqədən az olmamalıdır.

Müsabiqə işləri AccessBank-ın İctimaiyyətlə əlaqələr üzrə şöbəsinə təqdim olunmalıdır: nigar.mammadova@accessbank.az və ya zeynab.tarverdiyeva@accessbank.az elektron ünvanına, ya da poçt ünvanı: Azərbaycan, AZ 1065, Tbilisi prospekti 3 (Qeyd: "İctimaiyyətlə əlaqələr üzrə şöbəyə. Müsabiqə üçün"). Əlavə məlumat üçün: +994 12 408 23 87 /47; 012 510 10 24; 510 14 03 (daxili 109).

Müsabiqəyə təqdim olunan materiallar azad jüri tərəfindən qiymətləndiriləcək. Bunlar: Beynəlxalq Maliyyə Korporasiyasının Bakı ofisinin rəhbəri Aliyə Əzimova, Azərbaycan Mikromaliyyələşdirmə Assosiyasiyasının icraçı direktoru Jalə Hacıyeva, AccessBank-ın Mikrokredit Departamentinin rəhbəri Tariyel İsmaylovdur.

Müsabiqənin nəticəsinə əsasən, 1-ci yerin qalibinə 1000 manat, 2-ci yerə layiq görülənə - 800 manat, 3-cü yerə layiq görülənə isə 600 manat məbləğində pul mükafatı veriləcək.

Müsabiqənin qalibləri haqqında elan AccessBank-ın rəsmi saytında 10 oktyabr 2012-ci il tarixinədək yerləşdiriləcək.  --15D--