Aİ ilə yaxınlaşma Qara dəniz regionunda biznes xərclərini azaldacaq

Bu gün Bakıda «Qara dəniz regionunda sərhəd xərcləri» beynəlxalq konfransı keçirilib. Onun əsas leytmotivi hövzə ölkələri arasında iqtisadi əməkdaşlığın yalnız Avropa İttifaqına inteqrasiya yolu ilə səmərəli olması, qanunların Avropa standartlarına uyğunlaşdırılması idi. 

Aİ bir sıra keçmiş sosialist ölkələri ilə inteqrasiya siyasəti yürüdür. Amma Aİ ilə bu ölkələr arasında münasibət səviyyəsi fərqlidir. Azərbaycan bu prosesdə geri qalır. Çünki Ümumdünya Ticarət Təşkilatına üzvlük danışıqlar mərhələsindədir. Şərq Tərəfdaşlığı üzrə bir sıra ölkələr Aİ ilə azad ticarət üzrə Dərin və Hərtərəfli Saziş imzalamağa hazırdır. Rumıniyanın Avropa Siyasəti Mərkəzinin təmsilçisi Stanislav Sekrierunun sözlərinə görə, Aİ-yə iqtisadi inteqrasiya ilk növbədə satış bazarının şaxələnməsidir və qarşılıqlı faydalıdır. 

Milli Məclisin üzvü Əli Məsimli qeyd edib ki, iqtisadi islahatlar barədə təşəbbüslərlə yanaşı, Aİ Azərbaycana demokratiya və insan haqlarının dərinləşdirilməsi üzrə paket təqdim etməlidir. Yalnız bu yolla iqtisadi islahatlar cəmiyyətin hərtərəfli inkişafına kömək edə bilər. 

«Azad İqtisadiyyata yardım» İB-nin rəhbəri Zöhrab İsmayıl hesab edir ki, Qara dəniz hövzəsi ölkələrinin Aİ-yə inteqrasiyası üçün iqtisadiyyatın livberallaşdırılması: malların, investisiya və işçi qüvvəsinin azad hərəkətinin təmin edilməsi lazımdır. Bu maneələr ticari-iqtisadi əlaqələrin genişlənməsinə mane olur və biznes xərclərini artırır. Bundan həmin ölkələrin istehlakçıları – vətəndaşlar itirir. 

Konfransda bildirildi ki, qanunları və Aİ direktivlərini gözüyumulu, yerli şəraiti nəzərə almadan köçürmək olmaz. Həmçinin qanunun aliliyi və məhkəmələrin müstəqilliyi və ədalətliliyi təmin edilməlidir.   

Konfransda Ukrayna, Gürcüstan, Almaniya, ABŞ və Rumıniyadan diplomatik missiya təmsilçiləri və ekspertlər iştirak ediblər. 08C