AİC son 3 il üçün maliyyə auditi keçirəcək

“Azərbaycan İnvestisiya Şirkəti” (AİC) ASC “Ernst and Yanq Holdinqs (SiAyEs) B.V” şirkətinin Azərbaycan filial ilə maliyyə hesabatlarının beynəlxalq audit standartlarına uyğun auditinin həyata keçirilməsi ilə bağlı müqavilə bağlayıb.

Yenilənmiş dövlət alqıları reyestrinə əsasən, müqavilənin məbləği ƏDV-siz 75000 manat təşkil edib. Audit üç illik dövrü (2012-2014) əhatə edəcək.

Alqılar üzrə Dövlət Agentliyinin məlumatına görə, 2012-ci ildə tərəflər 80 000 manat məbləğində belə bir müqavilə bağlamışdılar. 2011-ci ildə AİC auditor kimi “Baker Tilly Audit Azerbaycan” MMC-ni (5000 manat), 2011-ci ildə “Kaspian Konsaltinq” MMC-ni (2900 manat) seçmişdi.

“AİC” Dövlət ASC 2006-cı ilin martında ARDNŞ vəsaiti hesabına yaradılıb. Onun nizamnamə kapitalı 160 mln. manat təşkil edir. Bu şirkətin yaradılmasının məqsədi qeyri-neft sektorunun inkişafına yardım etməkdən ibarətdir.

Şirkət nə KİV-də, nə korporativ saytında illik maliyyə hesabatlarını və onlar üzrə auditor rəylərini dərc etmir, bunun nəticəsində onun kapital resursları və şirkətlərin kapitalda iştirakdan aldığı dividendlər haqqında məlumat yoxdur.

2012-ci ildə AİC hər birində 25% pay iştirakı olan iki layihədən çıxıb (“Səngəçal neft-qaz terminalı” QSC və “Azərbaycan Duz İstehsalı Birliyi” QSC). Sövdələşmələrin ölçüsü açıqlanmayıb. AİC bu şirkətlərdə müvafiq olaraq 9 mln. dollar və 2,9 mln. dollar investisiyaya malik idi.

AİC-in fəal investisiya siyasəti 2011-ci ildən dayandırılıb. Hazırda şirkətin “Holcim (Azərbaycan)” (10%), “Saba” (25%), “Xəzər Beynəlxalq İnvestisiya Şirkəti” (24,1%), “Milk-Pro” (20%), “Ağstafa Aqrotexservis” (25%), “Azərtoxum” (17,46%), “Bakı Gəmiqayırma Zavodu”nda (10%) pay iştirakı var. -08B-