Beynəlxalq konfrans: İnsan hüquqları və qabaqlayıcı idarəçilik kontekstində dövlət xidmətləri

Bu gün Bakıda Abşeron (JW Marriott) otelində Azərbaycanın Avropa Şurası Nazirlər Komitəsində sədrliyi çərçivəsində Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin təşkilatçılığı ilə “İnsan hüquqları və qabaqcıl idarəetmə kontekstində dövlət xidmətlərinin göstərilməsi” mövzusunda beynəlxalq konfrans açılıb.

Konfransda Avropa Şurasının üzv dövlətlərindəki dövlət xidmətlərinin göstərilməsi üzrə qabaqcıl modellər, bu kimi modellərin fəaliyyəti üçün zəruri olan prinsiplər və onların inkişafını təmin edən informasiya texnologiyalarının rolu, dövlət xidmətlərinin göstərilməsi sahəsində  problemlər və gələcək perspektivlər müzakirə olunur.

İki gün davam edəcək tədbirdə 30-dan çox dövləti, Avropa Şurası, BMT, ATƏT, Avropa İttifaqı, Korrupsiya əleyhinə Beynəlxalq Akademiyanı, bir sıra xarici QHT-ləri təmsil edən 50-yə yaxın xarici nümayəndə iştirak edir.

“Azərbaycanda dövlət qulluğu modernləşir, yeniliklər tətbiq olunur. Bu baxımdan Asan Xidmət nadir və innovativ yoldur. Artıq 10 dövlət qurumu xidmətlərini Asan Xidmət vasitəsi ilə təklif edir. Vətəndaşlara şəffaflıq şəraitində keyfiyyətli və effektiv xidmət göstərilir. Xidmətlərin sürətli həyata keçirilməsi prosesi də davam etməkdədir”, deyə Azərbaycan Prezidenti yanında vətəndaşlara xidmət və sosial innovasiyalar üzrə Dövlət Agentliyinin sədri İnam Kərimov bildirib.  

Onun sözlərinə görə, hər gün orta hesabla 2 min insan Asan Xidmət mərkəzindən istifadə edir. “Asan Xidmətin 6 mərkəzi var. Son 20 ayda 3 milyon insan bu xidmətdən faydalanıb, məmnunluq hissi isə 98 faizdir”, deyə o qeyd edib. 

Kərimovun sözlərinə görə, Asan Xidmət artıq dövlət xidmətinin konsepsiyasını dəyişib, vətəndaşlar üçün xidmətlər etik davranış, korrupsiyaya qarşı mübarizə, tez və şəffaflıq şəraitində əlçatandır. 

ATƏT-in iqtisadi və ətraf mühit üzrə əlaqələndiricisi Halil Yurdakul Yiğitgüdən bildirib ki, Azərbaycanda insanlara səmərəli xidmət imkanları artıb. “Xidmətlərin bir nöqtədə, - Asan Xidmətdə birləşdirilməsi daxili idarəçiliyi asanlaşdırıb və effektivliyini artırıb. ATƏT bu sahədə Azərbaycana texniki dəstək  göstərib, Asan Xidmət əməkdaşlarına təlimlər keçirib. Yaxşı idarəçilik üçün şəffaflıq və hesabatlılıq vacibdir”, deyə o qeyd edib.

Avropa Şurasının demokratik təsisatlar və idarəçilik departamentinin rəhbəri Alfonso Zardi bildirib ki, dövlət xidmətləri daha geniş ictimaiyyəti əhatə etməlidir. “Bu zaman insan hüquqlarına hörmət əsas amil olmalıdır. Diskriminasiya, ayrı-seçkilik olmamalıdır. Xidmətlər əlçatan, açıq və şəffaf şəkildə göstərilməlidir.  Dövlət qurumları vətəndaşların onlardan gözləntilərinə hörmət etməldir”, deyə o qeyd edib.

Beynəlxalq konfrans “Dövlət xidmətlərinin göstərilməsi üzrə müasir modellər: İnsan hüquqlarına daha yaxşı necə xidmət etmək olar?”, “Dövlət xidmətlərinin göstərilməsinin prinsipləri: əlçatanlılıq, şəffaflıq... daha nələr?”, “Dövlət xidmətlərinin göstərilməsində müasir texnologiyalar: Səmərəlilik və vətəndaşların ən ümdə maraqları” mövzuları ətrafında müzakirələrlə davam edir. -03         C-