ARDNŞ ən pis NQÇİ-də təhlükəsiz iş şəraitinin təminatını üzərinə götürüb

Dövlət Neft Şirkəti N.Nərimanov adına NQÇİ-də təhlükəsiz iş şəraitinin təminatı ilə bağlı Tədbirlər Proqramını təsdiq edib.

ARDNŞ mətbuat xidmətinin məlumatına görə, proqram bu günlərdə “Azneft” İstehsalat Birliyinin N.Nərimanov adına Neft və Qazçıxarma İdarəsinin istehsalat obyektlərinin təhlükəsiz istismarının təmin edilməsi, eləcə də mövcud infrastrukturlarda yenidənqurma işlərinin aparılması məqsədi ilə keçirilmiş müşavirədə təsdiq edilib.

Tədbirlər Proqramında 2015-2016-cı illər ərzində N.Nərimanov adına NQÇİ-də əsas kapitala yönəldilən investisiyaların azaldılması, əsaslı təmir xərclərinin artırılmasını nəzərdə tutur.

Proqrama NQÇİ-nin istismar etdiyi bir sıra köhnə meydançaların təmiri ilə bağlı layihələrin hazırlanması, ehtiyac duyulan hallarda vaqon evciklərin quraşdırılması, əvəzedici estakadaların tikintisi, özüllərarası neft-qaz xətlərinin çəkilməsi, qazpaylama sistemində, meydançalardakı enerji sistemlərində yenidənqurma işlərinin aparılması kimi məsələlər də daxil edilib.

2014-cü ilin oktyabr-noyabrında N.Nərimanov adına Neft və Qazçıxarma İdarəsində iki bədbəxt hadisə olub: №441 özüldə təmir zamanı qəza olub və 310 və 312 saylı meydançalar arasındakı təqribən 60 metrlik estakadada uçqun baş verib. Nəticədə 5 nəfər həlak olub.–12D--