ARDNŞ-nin törəməsi qazpaylayıcı şirkəti alıb

ARDNŞ-nin törəməsi olan Alphard (Gas) Holding B.V. Gürcüstandakı “İtera” MMC-nin qazpaylayıcı aktivlərinin əldə edilməsi üzrə əqdi başa çatdırıb. Bu barədə SOCAR Energy Georgia-nın dünənki press-relizində bildirilir.

Aktivlərə 10 qazpaylayıcı şirkət daxildir: “Kutaisiqaz” SC, “Rustaviqaz” SC, “Qoriqaz” SC, “Kaspiqaz” SC, “Bolnisiqaz” SC, “Tetrisxaroqaz” SC, “Borjomiqaz” SC, “Tercolaqaz” SC, “Samtrediaqaz” SC və “Vaniqaz” SC, deyə “Novisti-Qruziya” agentliyi məlumat verir.

“Alphard (Gas) Holding B.V. əhaliyə xidmətləri yaxşılaşdırmağı, fasiləsiz qaz verilməsini, şəbəkəyə yeni abunəçilərin qoşulmasını təmin etməyi planlaşdırır”, - deyə press-relizdə bildirilir. 

Aleksandr Xetaquri Itera Georgia Ltd şirkətinin direktoru təyin edilib. O, müxtəlif illərdə Gürcüstan neft-qaz korporasiyasının direktoru (2006-2007), energetika naziri (2007 - avqust 2012) və maliyyə naziri (avqust - oktyabr 2012) olub.

ARDNŞ törəməsi SOCAR Energy Georgia vasitəsilə Gürcüstanda 30 qazpaylayıcı şəbəkəyə sahib olub. Itera Georgia-nı almaqla daha yüz müəssisə, o cümlədən 10-nun nəzarət paketi Itera Georgia-ya məxsus 38 regional  qazpaylayıcı şirkət üçün tədarükçü olub. 

Əvvəllər ARDNŞ prezidenti Rövnəq Abdullayev bildirib ki, ARDNŞ Itera Georgia-nı almaqla Tbilisi istisna, bütün Gürcüstanda yeganə pərakəndə qaz operatoru olub. --0—