Auditorlar Palatası KPMG-ni yoxlayacaq

Bakı/21.07.17/Turan: Auditorlar Palatası KPMG auditor şirkətini yoxlayacaq "Bu, mənim Bank Standardın Kreditorlar Komitəsinin adından Palataya, KPMG-nin qeydiyyatda olduğu İsveçrə və baş ofisin olduğu Niderlanda göndərdiyim məktub sayəsində mümkün oldu",- deyə Bank Standardın Kreditorlar Komitəsinin sədri Əkrəm Həsənov Turan-a bildirib.

Məlumdur ki, Bank Standard və Texnikbankın auditoru bu şirkət olub. Nəticədə bu banklara 1 mlrd manatdan çox vəsait qoyan şəxslər pullarının itirilməsi təhlükəsi ilə üzləşib. "Ona görə KPMG-nin bu bankların iflasa uğramasında rolu araşdırılmalı idi. Bu təşikilat həm də Bank Standardın qalan əmlakının qiymətləndiricisidir və buna görə ödəniş alıb.

Məktubuma cavabında Niderland səfirliyi bildirir ki, müraciətimi baş ofisə göndəriblər. Auditorlar Palatası bildirir ki, kollegiya iclasında bu şirkətdə əlavə yoxlama aparılması barədə qərara qəbul edilib. Nəticə barədə məlumat veriləcək", - deyə ekspert bildirib.

Onun sözlərinə görə, bankların iflası şirkət barədə şübhələr yaradır: "Əmanətlərin Sığortalanması Fondu bu şirkəti Bank Standardın aktivlərinin qiymətləndirilməsinə cəlb edib. Bu, doğru addım deyil. 2012-ci ilin sonuna kimi bu bankların kənar auditoru PWC olub. Sonra bu şirkətin əməkdaşı KPMG-yə keçib və müştəriləri də ora aparıb. Məhz onun sayəsində son illər bu banklarda normal audit keçirilməyib".

ADIF isə bildirir ki, bir şirkətin müştərisi müflis olubsa, bu, o demək deyil ki, onun xidmətindən istifadə etmək olmaz. "KPMG böyük dördlüyə daxildir və onun rəyi dünyada qəbul edilir", - deyə Fondda hesab edirlər.-0-