Avqustda İcbari Sığorta Bürosunun üzvləri AVSMMİS çərçivəsində 2 milyon manat ödəniş edib

İcbari Sığorta Bürosunun üzvləri 2013-cü ilin avqust ayı ərzində “Avtonəqliyyat vasitəsi sahiblərinin mülki məsuliyyətinin icbari sığortası” üzrə 1455 tələb üzrə 2 059 443.14 manat məbləğində  sığorta ödənişi həyata keçirib. 

Bürodan verilən məlumata görə, daha çox ödəniş (1 mln 886 min 81,25 manat) 1 348 hadisə üzrə avtomobilə ziyana görədir. Əmlaka dəyən ziyana görə 59 hadisə üzrə 76 min 61,89 manat, sağlamlığa dəyən ziyana görə 38 hadisə üzrə 47,3 min manat ödənilib. YNH-də ölümə görə (10 hadisə) 50 min manat ödənilib. İştirakçı sığorta şirkətlərinə qarşı irəli sürülən 240 sığorta tələbi isə baxılma mərhələsindədir.

Yanvar-avqust ayları ərzində “Avtonəqliyyat vasitəsi sahiblərinin mülki məsuliyyətinin icbari sığortası” üzrə iştirakçı sığorta şirkətləri tərəfindən 10894 sığorta tələbi üzrə 15 milyon manatdan çox ödəniş edilib. 2012-ci ildə bu göstərici 6,83 mln manat idi. 

Büro 2013-cü ildə AVSMMİS üzrə ödənişləri 20 mln manat proqnozlaşdırıb. 

İcbari Sığorta Bürosu 16 dekabr 2011-ci ildə yaradılıb. Hazırda 12 üzvü var. 

Avtomobillərin sığortasının qiyməti 1,5 min sm3 üçün (AVSMMİS üzrə) 50 manatdır. Mühərrikin həcmi artanda 1,5 (5 min sm3-ə qədər) və 5 (5 və daha artıq sm3) əmsal artırılır. 

Sərnişin nəqliyyatının avtosalonu və ya yük avtomobilinin tonnajı artanda da baza qiyməti artır. 

Avtobuslar, mikroavtobuslar və onların   bazasında istehsal edilmiş digər avtonəqliyyat vasitələri – sərnişin yerlərinin sayına görə 9-dan 16-dək 3 əmsalı, 16 yerdən çox olanda 4 əmsalı artırılır.

Yük avtomobiləri üçün əmsal 3-5 arasıdır. 

Motosikl, traktor və başqa kənd təsərrüfatı texnikası üçün əmsal minimaldır. Qanuna əsasən, əmlaka dəyən ziyana görə 5 min manat,  bir şəxsin sağlamlığına dəyən ziyana görə 5 min manat, bir sığorta hadisəsi üzrə maksimum 55 min manat ödənilir. --17D—