Avqustda istehlak qiymətləri 0.1% azalıb - DSK (YENİLƏNİB)

2015 Sentyabr 04 (Cümə) 12:00:01

Bu ilin avqust ayında əvvəlki ayla müqayisədə istehlak mallarının qiymətləri 0,1 faiz ucuzlaşıb, - deyə Dövlətstatkom bildirir.

Bütün ölkəni əhatə edən statistik müşahidələrə əsasən, ötən ay əvvəlki ayla müqayisədə ərzaq məhsullarının qiymətləri 0,3 faiz, əhaliyə göstərilən pullu xidmətlərin qiymət və tarifləri 0,1 faiz ucuzlaşıb, qeyri-ərzaq mallarının qiymətləri isə 0,1 faiz bahalaşıb.

Avqustda iyulla müqayisədə qarabaşaq yarmasının, sümüklü mal və qoyun ətinin, kərə yağının, şəkərin, bir çox mövsümi meyvə və tərəvəzin qiymətləri ucuzlaşıb.

Düyünün, buğda ununun, makaron məmulatlarının, toyuq ətinin, balıq məhsullarının, yumurtanın, bitki yağlarının, qara və yaşıl çayın, spirtli içkilərin qiymətlərində isə bahalaşma müşahidə olunub.

Qeyri-ərzaq mallarından parçaların, inşaat materiallarının, minik avtomobilləri üçün ehtiyat hissələrinin, məişət cihazlarının qiymətlərində bahalaşma, geyimin, dərmanların, minik avtomobillərinin, telefon aparatlarının qiymətlərində isə ucuzlaşma müşahidə olunub.

DSK-nın müşahidəsinə görə, avqust ayında əhaliyə göstərilən pullu xidmətlərdən hava nəqliyyatı ilə beynəlxalq sərnişindaşıma tarifləri ucuzlaşıb, ali təhsil müəssisələrində təhsil haqları isə bahalaşıb.  

Azərbaycanda deflyasiya apreldən başlayıb və beş aydır davam edir.

Ötən ayla müqayisədə istehlak mallarının və xidmət tariflərinin qiymət dinamikası:

08D