Avqustda rekord sayda torpaq sahəsi hərraca çıxarılıb

Dövlət Torpaq və Xəritəçəkmə Komitəsinin 19 avqusta təyin etdiyi hərraca 549 bələdiyyə torpağı çıxarılıb. Onların çoxu fərdi ev tikintisi üçündür.

DTXK-nin məlumatına görə, regionlarda 300-dək torpaq sahəsi fərdi ev tikintisi üçün təklif edilir. Qalan torpaqlardan sahibkarlıq obyekt tikintisi və kənd təsərrüfatı işləri üçün istifadə etmək olar. 

Həmişə olduğu kimi, Abşeron bələdiyyələri daha aktivdir: onlar 252 torpaq sahəsini hərraca çıxarıb. Onların çoxu qeyri-kommersiya məqsədlidir. Bu rayonda 3 bələdiyyə satışa satışa iri torpaq sahəsi çıxarıb. Məhəmmədli bələdiyyəsi 19 ha (start qiyməti 247 min manat), Fatmeyi – 5 ha (257 min manat) və Hökməli 20 ha (546 min manat) torpaq satır.

Sumqayıt bələdiyyəsi 27 torpaq sahəsi sahəsi təklif edir. Bunların ikisindən (ümumi sahə 5,47 ha) 305,5 min manat gəlir gözlənilir.

Hərrac yolu ilə avqustda 49 torpaq sahəsi satmaq nəzərdə tutulur. Qalanları müsabiqə yolu ilə satılacaq. 73 torpaq sahəsi icarəyə veriləcək.

Korrupsiya və sui-istifadə ittihamı və faktlarına baxmayaraq, bələdiyyələr torpaqları bazar qiymətinə satmır. Məsələn, Abşeronun Saray kəndində rielterlər 1 sot torpağı 3000 manatdan ucuz vermir. Bələdiyyələr isə 6 sotu bu qiymətə “təklif edir”. Ağcabədidə 1 sot torpağı bələdiyyə 996 manata, Goranboyda 1300 manata təklif edir. Məlumdur ki, hərrac başlayandan (aprel 2009) müsabiqələr əsasən rəqabətsiz keçir və start qiymətinə satılır. 08B