Avstriya naziri ATƏT sədri kimi Azərbaycana gələcək

Bakı/23.09.16/Turan: Azərbaycanın xarici işlər naziri Elmar Məmmədyarov BMT Baş Məclisinin 71-ci sessiyasında iştirakı çərçivəsində Avstriyanın Federal Avropa, inteqrasiya və xarici işlər naziri Sebastian Kurz ilə görüşüb. Xəbəri Azərbaycan XİN yayıb.

Xəbərə görə, görüşdə iki ölkə arasında siyasi dialoqun intensiv xarakter daşıdığı və əməkdaşlığın daha da genişləndirilməsi üçün əlverişli imkanların olduğunu bildirilib.

Xəbərdə deyilir ki, S.Kurz Azərbaycan hökuməti tərəfindən yaradılan biznes mühitini təqdir etdiklərini və Avstriya şirkətlərinin Azərbaycana sərmayə yatırtmaqda maraqlı olduğunu deyib. O, Avstriya Hava Yollarının Bakıya uçuşları bərpa etmək niyyətində olduğunu da qeyd edib.

E.Məmmədyarov Azərbaycanın Avstriya ilə iqtisadi əlaqələri inkişaf etdirməkdə maraqlı olduğu, bu xüsusda Avstriya sərmayəsinin ikitərəfli münasibətlərə töhfə verəcəyinə əminlik ifadə edib.

ATƏT-ə növbəti sədrlik edəcək ölkə kimi Avstriyanın mövcud münaqişələrin həllinə səylər göstərəcəyini bildirən S.Kurz, bu statusda Azərbaycana səfər etmək, ikitərəfli və çoxtərəfli formatda müxtəlif məsələləri müzakirə etmək niyyətində olduğunu bildirib.

Xatırladaq ki, hazırda ATƏT-ə Almaniya sədrlik edir. 2017-ci ildə isə sədrliyin Avstriyaya təhvil veriləcəyi artıq məlumdur. ATƏT-in Minsk qrupu (ABş, Fransa və Rusiya) Qarabağ münaqişəsinin tənizmlənməsində 1996-cı ildən vasitəçilik edir. -06D-