AXDG Davamlı İnkişaf haqqında Hesabatı üzrə müsbət rəy alıb

Bakı/30.06.16/Turan “Ernst & Young” şirkəti Azərbaycan Xəzər Dəniz Gəmiçiliyinin Davamlı İnkişaf haqqında Hesabatını müstəqil auditdən keçirərək  müsbət rəy verib.

 Hesabatda (http://www.acsc.az/az/pages/2/252) Gəmiçiliyin 2014-2015-ci illərdə iqtisadi, sosial və ekoloji sahələrdə fəaliyyətinin nəticələrini tam şəffaf açıqlayan Hesabatda keyfiyyət, sağlamlıq, ətraf mühitin qorunması, əməyin mühafizəsi, kadrların idarə edilməsi və digər sosial sahələrdə yerinə yetirilmiş işlər və əldə olunmuş nailiyyətlər öz əksini tapıb, deyə AXDG-nin hesabatında qeyd edilir.

AXDG-nin Davamlı İnkişaf haqqında Hesabatı Beynəlxalq Qlobal Hesabatlılıq Təşəbbüsünün GRI Sisteminin logistika və nəqliyyat xidmətlərinə dair mövcud tələbləri nəzərə alınaraq hazırlanmışdır. Bu proses 2015-ci ilin noyabrından başlanmış və sənəd 2016-cı ilin əvvəlində müstəqil beynəlxalq audit şirkətinə təqdim edilib.

Beynəlxalq iqtisadiyyatda müşahidə edilən qlobal çətinliklər, onların iqtisadi fəaliyyətə təsiri fonunda davamlı inkişafın təmin olunması, iqtisadi, sosial və ekoloji sahələrdə qarşıya qoyulmuş vəzifələrin reallaşdırılması AXDG üçün uğurlu fəaliyyətin başlıca meyarıdır.
Qeyd edək ki, bu sənəd AXDG-nin Davamlı İnkişaf sahəsində ilk hesabatıdır. Öz növbəsində Azərbaycan Xəzər Dəniz Gəmiçiliyi Xəzər hövzəsində Sosial Korporativ Məsuliyyəti üzrə fəaliyyətinə dair Davamlı İnkişaf haqqında Hesabatını açıqlayan ilk gəmiçilik şirkətidir. 08D