Azərbaycan 2017-ci ildə neft hasilatını sutkada 35 min barrel azaldacaq - nazir

Azərbaycan 2017-ci il yanvarın 1-dən neft hasilatını sutkada 35 min barrel azaldacaq, deyə energetika naziri Natiq Əliyev Vyanada Neft İxrac Edən Ölkələrin Təşkilatına (OPEK) üzv və kartelə daxil olmayan ölkələrin görüşünün yekunları ilə bağlı açıqlamasında bildirib.

"İclasın ümumən müsbət keçdi, OPEK və qeyri-OPEK ölkələri arasında əməkdaşlıq haqqında Bəyannamə imzaladı. Görüşdə OPEK ölkələri gündəlik neft hasilatını 32,5 mln barrel həcmində saxlamaqla bağlı öhdəliklərini bir daha təsdiqləyərək, bu həcmdən artıq neft istehsal etməyəcəklərini bəyan etdilər”, deyə N.Əliyev qeyd edib.

Görüşdə OPEC-ə üzv olmayan 11 ölkə iştirak edib. Bu ölkələrin 2017-ci il yanvarın 1-dən gündəlik neft hasilatını 558 min barrel azaltmaları barədə razılıq əldə olunub. Rusiya isə hasilatı gündəlik 300 min barrel azaltmağa razılaşıb.

Natiq Əliyev bildirib ki, qəbul edilən qərarın icrasına nəzarət məqsədilə Rusiya və Küveytin rəhbərliyi ilə Monitorinq Komitəsinin yaradılması məqsədəuyğun hesab edilib. OPEC və təşkilata daxil olmayan ölkələr razılığa gəliblər ki, neft bazarında qiymətlərin sabitliyinin uzunmüddətli olması üçün mütəmadi görüşlər keçirilsin. Eyni zamanda tədbirdə iştirak etməyən digər qeyri-OPEC ölkələri də bu sazişə qoşulmağa dəvət edilib.

* 10 noyabrda Vyanada OPEK və qeyri-OPEK ölkələri arasında görüş olub. Əvvəllər OPEK öz neft hasiltını azaltmağı qərara almışdı. Hazırda Brent markalı neftin qiyməti $54-dır. Bu, noyabrdakı orta qiymətdən 20% çoxdur. –12В--